Bzidawoneka pamui ubodzi, thimu la maswaka lidapangana kupha nkhalamba zentsene kuti ufiti bumale.

Tsono m'bodzi wawo adathawisa nkhalamba ibodzi yomwe ikhali babace acikaibisa m'thengo.

Pomwe adamala bzimwebzo ndipo angayamba kupha tsapano nkhalamba zentsene zinango zire.

Tsono khale-khale idabwera nyoka m'muimo icicokera m'thengo, icikapita m'mimba mwa mwana m'bodzi. Ikakhala-khala ikhambacosa msolo kunja na pamulomo pamwanayo.

Ndipo abereki wa mwanayo na wanthumbo winango akhatangwanika nabzo bzimwebzo kwene-kwene, nakuti iwo akhawona kuti tikapha nyokai, tiniphambo mwanai pomwe.

Ndipo wentse adandokhala wakutangwanika.

Na tenepo tswaka lire lidakumbuka kukafotokozerambo malengwa yale nkhalamba yace yomwe akhadabisa ire.

Ndipo nkhalamba ire idati: "Bzimwebi bzribe kunesa na pang'onopo. Iwepo ndoko ukatenge cule ukamumangirire pafupi na pana nyokapo, mun'kawona kuti nyokayo in'kasololoka m'mimba mwa mwanamo icikameza culeyo."

Cadidi tswaka lire lidakacita ninga momwe lidauzidwiramo na nkhalamba ire. Ndipo nyoka ire idasololokadi iciyenda kukameza cule ule.

Na tenepo mwana ule adapulumuka paimfa.