Mwaakha mmoha epula hiyaarumpe. Miri sahinyaala suuma.

Mihice saaweleela ihikhala ni maahi.

Ashinama ni achu yaapacerya okhwa etala ni nthanana.

Mwaco ni Echepo, yaari ahooleli aashinama, yaathukumana wi evarerye mwaha yoola.

Mwaco, aahi: "Nnamookhwa nthanana. Niwiichane ashinama oothene wi nivaanyihane, nthipe ehime wi niphwanye maahi niwuryeke."

Echepo yaaheemererya, yaaleela ashinama oothene masu ala, eriki: "Amwene aMwaco ni Aneechepo annaniichana."

Ashinama oothene yaathukumana, wi evererye mwaha yoola eri vathi wa mwiri mutokotoko.

Mwaco aapacerya oloca ariki: "Mukiwiriyane asinnaka. Mwaakha yoola epula herumpe. Oothene ninnakhwa etala ni nthanana, nivinye oothene nipake ehime wi nnawuryavo."

Ashinama oothene yaaheemererya. Mwanvayi yaakusha ihipa, iphaya vamoha ni apikareta epacerya othipa.

Nto Macika haaruule. Ashinama yaapacerya othipa.
Yaathipa yiishiha ephwanya maahi.

Eloca, eriki: "Vanonto noophwanya maahi. Nthipaka Macika haarivovo. Ntakhara sheeni Macika ahaaruleiye onthipiha? Ahirwe vaava owurya maahi yaala."

Vahilekenle Macika aahirwa, ii: "Omuroo, omuroo." Hiiwale echu elapo yaari cuu.

Aavolowa awurya maahi. Awunrye aaheeceeca vaavale elukuluku yavakhaani.

Mmeeloni mwaya ashinama yaavarenryaayavo yaaphwanya maahi yuutuwelen'ye, eri ancokwi. Yaawo yaakohana, eriki: "Taani okhanle mweerano echu yawi siiyeela."

Mwaashinama mukina aahaakhula, ii: "Ti Macika, ntakhara nthipaka ehime haaruule."

Va nthowa nenla ashinama yaalakana omukuhavo mulipa ooweherya veehimeni vaavale. Ekuhavo Elupa yakhole wi enawehererya ehime yeele. Elupa ewehereryaka hiihaale, Macika aahirwa, ii: "Omuroo! omuroo!"

Elapo yaheera cuu. Uuluula tho: "Omuroo!" Elupa yakhole yahaakhula, eriki: "Eviree!" Macika aarwa alocela elupa yeele ii: "Nthamwene kooruuha echu yeele yoowaasivela achu atokweene." Elupa yaahaakhula eriki: "Orwenno koone echu eyo." Macika aakhalano enuwi awe.

Akusha avaha elupa yeele, ii: "Olawihe." Elawihaka hiihaale Macika aarika maahi. Arowaka Napiili aamoona macika yoole.

Mmeelo mwaya Napiili aaphiyaleiye ahaaleela ashinama oothene wi Macika aarika maahi mweehimeni mwemmwe.

Ekwaha yeela yaathanla ewuvyu wi ekhale mulipa
ooweherya weehimeni. Ewuvyu eri weiwe macika aaphiya ohiyu ariki: "Omuroo." Ahikhala aakhunle, ahuuluula tho elapo emaala cuu!

Hiihaa aavolowa apacerya aniilocela meekheiye, ariki: "Mi ka Macika! kinamvolowa wi kiwurye maahi vakhaani."

Ewuvyu yaaphiyalaaya weehimeni yiipinthe onikhukuni wa mwala. Hiihaa Macika aavolonweiye mweehimeni hoona Ewuvyu ntakhara yaaphwanaphwana ni mwala yoole.

Macika aaya mmaahini Ewuvyu yamphara mweco.

Hiihaa Macika, aahi: "Hokiphanre ophanre mwiri." Nto Ewuvyu hiyaalonce echu. Yamphara hiihaale ophiyerya nsuwa nikhumme.

Ashinama yaaphiyalaaya yahoona wi Ewuvyu yaahimphara Macika. Yaahiicanana ashinama oothene. Wi ethanle echu yoomweerala Macika.

Eri vamoha Mwaco aahaakoha, ii: "Tisheeni nnaphwanelaahu omweerela Macika yoola?"

Ewuvyu yahaakhula, yii: "Kinachuna wi Echepo emphare ni munyocolo aya yoole emmanihe mwala ole." Ashima oothene yaaheemereryihana.

Nto Macika aahaakhula ariki: "Moosuwela wi Macika avoholiwa vamwala hanakhwa, nto onakhwa ariheliwe vachuurwani."

Hiihaa Mwaco aaleela Echepo wi emphare Macika. Echepo yamphara Macika epacerya ommaniha vacuurwani.

Amanle osareya nchupi, Echepo yaamukusha emurihela vacuurwani.

Yaamurihenlaaya vachuurwani naasareyavo nchupi arumela: "Phu!" Nchupi naasareya makupa oothene. Ashinama yonnaaya nchupi yaatheya ehakalalaka.

Nchupi naamanlaaya ashinama evareryakavo hiyaamonne Macika, aacakanela! Hiihaa yaasuwela wi Macika ohaawoka tho ekwaha yanaawiili.

Ethale enamala vaava.