Likhalipo gole libodzi lomwe mbvula iribe kubvumba. Miti ikhamala kuuma.

Mikulo ikhadamala pomwe kuphuwa madzi.

Ndipo wanthu na bzirombo bzikhamala kufa na njala na nyota.

Ndipo Mphondolo na Ndzou bzikhali bzirombombo bzikulo.

Ibzo bzidapangana kuti: "Ife-pano kuti tisaye kufa na nyota mbatibwereni tikoncezane tentse kuti ticere m'cera kuti timbamwe madzi."

Ndipo Ndzou idabvumira, iciyenda kukalalikira bzirombo bzentse kuti "Mtumbe Mphondolo na Ndzou ali kuticemera."

Ndipo bzirombo bzire bzentsene bzidakoncezana bzicikakhala pa muti ukulu.

Ndipo Mphondolo idayamba kulewa-lewa iciti: "Onani, abale wangu, gole rino, mbvula iribe kubvumba. Ndipo bzinthu bzentse bziri kumala kufa na nyota. Tsono ife-pano tapangana kuti ticere m'cera kuti timbamwe ife-pano tense."

Ndipo bzirombo bzire bzidabvuma bzentse. Ndipo bzicikatenga mapaza, focolo na piki kuti bzikacere.

Tsono pompale Sulo akhalibe kubwera, ndipo iwo adayamba kucera, kucera ndipo aciphata madzi yale.

Pomwe adayaphata madzi yale, Mphondolo idalewa kuti: "Pomwe tayaphata madziya tinicita tani? Thangwe Sulo alibe kubwera kudzacera m'cerayu? Tsono iye animwa lini madzi pano!"

Ndipo Sulo pomwe adabwera adadzawona m'cera ule, ndipo iye nkhuti: "Tipite! Tipite kuncerako!" Ndipo iye adabva kuti zii.

Ndipo adapita acikatunga madzi yale, pomwe adamala nkhubvundulira-bvundulira madzi yale.

Mangwana yace pomwe bzirombo bzire bzidabwera bzidadzawona madzi yale yadabvunduliridwa yakhali matope yokha-yokha. Ndipo iwo adabvundza kuti: "Mbani wacita terepayuyu?"

Ndipo winangombo adalewa kuti: "Pinango ni Sulo thangwe pomwe tidacera m'cerayu nakuti iye pakhalibe."

Ndipo bzirombo bzire bzidapangana kuti bzikhale m'bodzi ulonda. Ndipo adasankhula Kolo kuti iye awonerere.

Pomwe Kolo adakhala pale, Sulo adabwera pakati pa usiku aciti: "Tipite! Tipite kugombeko!" Ndipo iye adabva kuti zii. Ndipo acicita pomwe: "Tipite! Tipite kugombeko!" Ndipo Kolo adatawira kuti: "Pitani!" Ndipo Sulo adapita, acimumusa aciti: "Xamwali, ndabwera na bzangu bzomwe ambadya akulu adamanga!" Ndipo Kolo adati: "Bwera tiwone!"

Sulo akhana uci bwace ndipo adayenda nabo kuna Koloyo, adati: "Inde Xamwali, bwera tibve!" Sulo adamupasa ucibule ndipo acitunga madzi yale. Pomwe Sulo akhacoka mum'ceramo ndipo Thika akhafikambo.

Pomwe Thika adamuwona Sulo ule, mangwana yace adayenda kukauza bzirombo bzinango kuti Sulo ali kutunga madzi mum'ceramo. Ndipo adasankhulambo Kamba kuti akhalembo.

Pomwe Kamba adakhala pale, Sulo adabwera pakati pa usiku aciti: "Tipite pam'cerapo!" Nee kubva munthu kumutawira nee. "Tipite pam'cerapo!" Ndipo adabva kuti zii.

Ndipo iye adapita aciyamba kumbalewa-lewa yekha-yekha acimbati: "Napo unyamale, ine-pano ndine Sulo. Ndinibwera basi kudzamwa madziya!"

Pomwe Kamba adapita mum'ceramo, adakabisala kumwala. Ndipo akhadanyalala ninga mwalayo.

Pomwe Sulo adapita, Kamba adamuphata mwendo, ndipo Sulo adati: "Ulibe kundiphata ine, waphata muzi iwe!" Ndipo Kamba alibe kumutawira. Ndipo iye adaphata basi mphaka kucena.

Pomwe bzirombo bzinango bzidabwera, bzidadzawona Sulo waphatiwa ndipo bzicicemera pomwe bzirombo bzentse kuti bzidzapangane kuti Suloyo bzinimucita tani.

Pomwe bzirombo bzentse bzidabwera, ndipo Mphondolo idabvundza kuti: "Timucite tani Suloyu?"

Ndipo Kamba adalewa kuti: "Ndinifuna kuti Andzouwa amutakule na citamba cawoci amumenyere pamwala!" Ndipo bzirombo bzinango bzire bzidabvumira.

Ndipo Sulo adatawirambo kuti: "Amtumbe Amphondolowa ambadziwa kuti Sulo ambafa lini na kumumenyeredwa pamwala tsono Sulo ambafa na kumumenyeredwa padotha."

Ndipo Mphondolo idauza Ndzou kuti imutakule Suloyo. Ndzou idamutakula na citamba icikamumenyera padothapo.

Pomwe adamudzusa pale adamukuiza padzulu kwene-kwene ndipo acimuthusa.

Pomwe iye adagwapo adacita m'jinci kwene-kwene kuti: "Phuuu! na pfumbi n'gondoo!" Pomwe bzirombo bzire bzidabva na kuwona pfumbi rire bzidaseka kwene-kwene.

Pomwe pfumbi rire lidamala, bzirombo bzire bziribe kudzamuwona pomwe Sulo kuti wayenda kuponi.

Ndipo ibzo bzidadziwa kuti Sulo watinamiza pomwe.