Yawonece caka cimo wula kuleka kunya. Yitela yajumwile ni yawile.

Sulo nganasipagwa ni mesi gatutwime.

Vandu ni yinyama vatandite kuwa sala ni njota.

Ce‑Disimba ni ce‑Ndembo, acimamwenye va yinyama, gasosangene kwiganyana yisawusyo.

Ce‑Disimba vatite, "Tumale kuwa njota. Kwende twavilanganye wose ni tutavisyane lunda lwa kusola cisima ni matala gakuti gapagwe mesi gatumweje."

Ce‑Ndembo vapikangene nayo ni vapelegenye dilove dila ku yinyama yose.

Yinyama yose yasosangene kwiganyana ngani pasi pacitela cimo cakwe cekulungwa.

Ni ce‑Disimba vatandite kuveceta ayi, "Mpikanicisyeje, vanya acimwene ni dada! Acino caka cino, wula nganajinya. Wose‑pe adi nkuwa sala ni njota. Nambo mwa uwe, tutende ditala dya kusola cisima pakuti wose tukole mesi gatumweje."

Yinyama yose yapikangene nayo mwa citema‑citema ni yakamwile majela, yipocolo ni yipiki ni yatandaga kusola.

Nambo a‑Kalunga nganayika. Yinyama yose yatandite kusevesa ndavi jijojo ni yasolaga. Ni yasolaga sooni n'nope.

Mbesi jakwe yagapatile mesi. Vanya‑wo pavayice kumesi, ce‑Disimba vatite, "Tucitenda yapi patugapatile mesi? A‑Kalunga nganayika kukamucisya kusola aci cisima. Vele ngang'wa aga mesi‑ga, mwa cimbalambanda!"

Pawujo pakwe, a‑Kalunga vakopocele ni pavaciweni cisima ni vatite, "Wodi, wodi pacisima!" ni ngadi cavacipikene.

Sano ni vajinjile, vang'wele mesi. Basi pavamasile, vadisiwice kandavi panandi nkati‑mo.

Disiku dine payayice yinyama, vayiweni kuti cisima cawo cadiji cangalondecela. Mesi nganagapitaga m'matope. Vanya‑wo vaawuusyanaga, "Vani va vatesile yicindu mpela yeleyi?"

Vane vajanjile, "Nguganisya kuti adi a‑Kalunga digongo patusosileje cisima, vele nganayiceje."

Pele yinyama yasayine kuvika londa pacisima ni yasagwile ce‑Dijani aloleleje yicindu.

Ce‑Dijani vadiji londa pavakopocele a‑Kalunga cilo, acitiji, "Wodi! Wodi! M'mesi!" Ni jiiii, ngadi capikene. Ni vavecete kane, "Wodi! Wodi! M'mesi!" Basi ce‑Dijani vajanjile, "Mpite!" Pele a‑Kalunga vakopocele ni vakolasile ce‑Dijani, "Nyice bwanawe, ni nyigele yeyila ya yikwakondaga acakulungwa kudya yila!" Ce‑Dijani ni vajanjile, "Njende, kwende tuyiwone yele."

A‑Kalunga vakwete wuci, vavandicile ni vatesile ce Dijani, "Ye bwanawe, n'nyipasye panandi ayi!" Ni vaapele wuci. Pawujo, vatyosisye mesi ga pacisima. Pavatyokaga wulendo, vayice a‑Ditunu ni vaaweni a Kalunga.

Disiku dine pavayice a‑Ditunu, vaasaadile aciyinyama wose kuti a‑Kalunga vatyosisye mesi ga pacisima.

Awuno wulendo wuno, yasagwile a‑Ngong'o kuti ave londa pacisima. A‑Ngong'o vadiji pamasengo pavayice a‑Kalunga cilo acitiji, "Wodi pacisima!" Jiiii. Nganapikana dilama ata dimo.

Pele vajinjile ni vatandite kudivecetela jika jawo kuti, "Yele ni ya yikusacikwa! Wune ndi a‑Kalunga! Ngwika kung'wa mesi panandi."

Pavayice a‑Ngong'o kucisima, vajuvile panyuma pamaduka ni vawonecelaga basi panandi pakwe vevala.

N'nyi ni yatite kwinjila a-Kalunga m'mesi, a Ngong'o vaakamwile lukongolo.

A-Ngong'o ngadi ya vatite ni vadiji citamile adi akamwile lukongolo mpaka kwacele.

Payayice yinyama yalolete kuti a‑Ngong'o vaakamwile a‑Kalunga. Vavilasile vane aciyinyama kuti asayine yakutenda na a‑Kalunga.

Pavasosangene wose, ce-Disimba vaawuusisye wose kuti, "Tutende cici na ava a-Kalunga?"

A-Ngong'o vajanjile, "Ngusaka kuti ce-Ndembo mwakamule ni caso cenu ni mwapuute nagala maduka gala." Yinyama yose yajiticisye.

Nambo a‑Kalunga vajanjile, "Vakulungwa ce‑Disimba, n'nyimanyi kuti acikalunga vangawa naga ni maduka. Kalunga basi akuwa naga kwaponya padiwu."

Pele ce‑Disimba vatesile ce‑Ndembo kuti vaakamule a‑Kalunga. Ce‑Ndembo vaakamwile vevala ni vatandite kwapuuta vevala padiwu.

Pawujo pakwe, a‑Kalunga pavadiji diwu‑diwu‑pe, ce‑Ndembo sooni vaakamwile ni vaaponyisye. Ce‑Ndembo pavapumwile, vatesile diwunde dyekulungwa dya luwundu.

Puuuu! Luwundu lwadiji m'mawupande wose. Yinyama wose payadiweni diwu‑dyo, yasekaga n'nope.

Luwundu palwatondweve, yinyama yalolete mumbadi nambo a‑Kalunga nganawoneka!

Sano pele ni yapikanicisye kuti a‑Kalunga valambwisye kane sooni!