Hi ni ngano ya Mfugadyi na zizi dya wana binensa wachiwa.

Agasti wiwa mwezi wa kazi nyinji kwa Mfugadyi na wasaiḍizi wakwe hapfa pfeḍi zizi dya kuyeya.

Mkite ekuwa na mwaka mmodza kafika d̯ura.

Kayehegwa na gari ya kidyani kiwitsi.

Mfugadyi na wasaiḍizi wakwe wamusikit̯ikia sana Mkite.

Ewa kakonda na ewa na masikit̯iko.

Ḅaad̯aye kachuchu, Mkite kapata nguvu.

Kaḍabva kutseza na hawa binensa wengine hapfo zizini.

Nsiku ingine ya mwezi wa Agasti, helikopita ihama hapfo pfeḍi zizi dya kuyeya.

Mfugadyi na wasaiḍizi wakwe wayawa mbio hukunze.

Humu mwe hi helikopita kwiwa na mwana nzovu kafunikizwa bilanket̯i.

Ekihanwa Ndiwa. Kavyajwa nsiku nsano tu zichiyezo.

Mfugadyi ekimuisa Ndiwa na nt̯upa.

Mwana mchiwa jwa hahu huo mwezi ewa Malea. Kayehegwa hapfo pfa hiḍizizi dya kuyeya na trakita nkundu.

Ewa na umri wa miezi mihandahu.

Kifwaru Malea mwedha mmodza kagijana na urafiki na Enkare, mwana jwa nyahi.

Kula pfantu wewa pfamodza.

Nanasiku modza, kula mmodza kayamuswa na kudza kwa Ambia.

Ambia ewa na umri wa miezi mitsano.

Ewa katsoka ḅaaḍa ya safari ndeya.

Kwa adyili ya ot̯iwe muyeya, imuḅiḍi Mfugadyi kuinusa hi nt̯upa dzuu kumuisa Ambia.

Vyana mpatsa Abei na Moit wafika kahi kahi ya mwezi wa Agasti.

Hivi vyana ntopfe viwa vivyajwa masaa machuchu yachiyeo. Viwa vijwazi muno.

Kula mmodza ewa na masikit̯iko wakat̯i Abei afwiyeo baaḍa ya wiki modza kudza kwakwe hapfa pfeḍi zizi dya mayezi.

Ela huyu Mfugadyi na wasaiḍizi wakwe wamupfonya Moit.

Wana wachiwa wa mwisho kufika hu mwezi wa Agasti wewa ni Kopi, Kepi na Keji.

Hivi vyana viwa na wiki mbii hangu kuvyajwa. Viwa na nzaa muno vipfofika.

Mfugadyi na wasaiḍizi wakwe wawatsaka hawana binensa wonse. Hat̯a hawaḍe wafudyo.

Mwana mfudyo jwa mwisho ewa Lobolia.

Lobolia ewa katsaka kudzifitsa kwa hivi kombe vyo Mfugadyi.

Hawa hendadyi kazi wa hapfo zizini wewa na ḅiḍii ya kuwat̯unza hawana binensa.

Wewa na mat̯umaini ya kwamba nsiku modza hawana binensa wadza dzisumamia wao. Ḅaaḍaye wadza kagala yuwandani.

Wana umuri ga na niwenga? Isome kawii hi ngano na uyadyibu hamaswali haya. 1. Kufika wana binensa wenga hapfo pfeḍi zizi dya kuyeya hu mwezi wa Agasti? 2. Ni mwana binensa ga afikiye d̯ura huwo huwo mwezi? 3. Ewa na umuri ga huyo huyo mwana binensa? 4. Ni wana binensa ga wafikiyeo mwiso? 5. Ni wana binensa ga wewokuwa na umuri mḍoḍo wafikiyeo humu zizini mwezi wa Agasti? 6. Wewa na umuri ga? 7. Ni mwana binensa ga ekuwa na umuri mukuu kufika hu mwezi wa Agasti?