Kazira kwahere kupura mapura. Nkareso zangesi kwazigwene kovakurona vendi. Awo ngava musansekere asi, "Nsene kapi okupura mapuro paapa ove simpe omunona, ngokakura ngomuntu gapira sinka."

Ezuva limwe Kariza kwapulire murongi gwendi, "Morwa sinke ava tutanterere vakurona vetu tulikuhwe komawoko komeho zokulya, nampili nsene mawoko getu kunakumoneka asi ganazere?"

Varongwa vakwayo vahere epuro lyendi. Nawo kapi vahere kuvatantera valikuhwe komawoko.

Murongi talimburura asi, "Olyo epuro lyewa, Kariza. Nampili mawoko getu kuna kumoneka asi ganazere, simpe kuvhura gakare nono kime."

Tatamununa mo momunene, "Nokime kureta mauvera. Udigu kumona nokime nomeho, twahepa kuruganesa yininke yapeke yononkondo yipo tuvhure kumona nokime."

Murongi takagusa Microscope/ekende lyokutaresa yininke yoyinunu mosikopa. "Microscope/ekende lyangesi kuliruganesa omone yininke yoyinunu eyi nodira kumona nomeho.

Murongi makura tagusa sitji gona azage mewoko lya Kazira makura tasi gogo sitji posininke asikara konhi zekende/microscope.

Makura murongi tatura oso simbapira koMicroscope, varongwa yiyo vamwene eyi mokutarera.

Nampili momu gamonekere Mawoko gaKariza asi kapi gana nyata, nye mawoko gendi gakere nonokime.

"Nokime kudigwana nakunye oku atukara, koyininke eyi atukwata monkondwarongero, mevango lyokudanene vanona ndi membo. Edi nokime ado kuvhura dika tuverese unene," yimo gava rondwere murongi.

Murongi tatwikire asi, "Mokudipaga po nokime, twahepa kuka kuhwa mawoko getu nomema gokuzera ntani nomfewa, unene po komeho zokulya. Ntani nsene kwa kuvera, twahepa kukuhwa mawoko getu yipo tudire kuhanesa nokime."

Apa gaya sikire kembo Kariza kwaya gwene Otate vendi kuna kuhonga siruganeso sosiwa. "Yinke munakurugana?" age tapura.

Esi kusitumbura asi 'kandagirukarabe' (torondopo makura okuhwe)," yimo vamulimbwilire. Kusiruganesa okuhwe mawoko goge pokumana kuruganesa kayuma/kasiyise, ndi komeho zokulya."

Eyi kwa tetwire Kariza makura age ntaninki asi, "Oho! Murongi gwetu ana tutantere kuhamena esi siruganeso, mara sinzi setu kapi twadiva asi ngapi ava siruganesa. Ngapi omu asirugana?"

Otate vendi tavazoro, tavamuninki asi, "Heda pepi nikulikide omu asi rugana munange."

"Pomuhowo, tolyata opo positji sina rara pevhu," tava mutantere oguhwe.

"Makura oso simbangu so mema tasi zenduka yipo mema gatjikire komawoko goge. Diworoka kulikuhwa nomfewa," tava mutanterere Kariza.

Kariza kwahefe makura uyunga asi, "Ngapi omu nani yidiva nayinye eyi nsene kapi ani pura mapuro? Wusili ava tanta asi mapuro kukupa nondunge/magano."