Kariza okwa li ehole oku pula omapulo. Uukwatya mbuka okwewu kutha kaakuluntu ye. Aavali ye oya kala hayemu lombwele taya ti, "Pula omapulo manga uli omugundjuka, uka kale omunawino ngele wakoko."

Esiku limwe, Kariza okwa pula omulongi gwe ati, "Omolwa shike aakuluntu yetu hayetu lombwele tu yoge omake getu manga inaatulya, nonande otaga monika ga yela?"

Aanasikola oyakwawo oya li ya nyanyukilwa epulo ndjoka. Nayo woo kaya li ye hole oku lombwelwa yiiyoge komake.

Omulongi okwa yamukula ati, "Epulo ndjoka ewanawa lela Kariza. Nonande omake getu taga monika gayela, otaga vulu natango oku kala gena oombakiteli."

Okwa yelitha ta ti, "Oombakiteli ohadhi eta omikithi. Ita tu vulu oku mona oombakiteli nomeho, ihe otwa pumbwa sha shilwe shina oonkondo, shi tu kwathele oku dhi mona."

Omulongi okwa kutha Omicroscope. "Omicroscope oyo oshilongitho shoka hashi longithwa oku mona uunima mboka uushuushuuka omeho getu ihaaga vulu okuwu mona," osho a ti.

Omulongi okwa yaga Kariza peke nokati, e te ka gwayeke kokande koku konakonitha.

Okakende koku konakonitha okweka tula komicroscope.

Sho ya tala mekende lyoku talela, oya mono mo oombakiteli dhazi komake gaKariza ngoka ga li taga monika gafa gayela.

Omulungi okwa yelitha ati, "Oombakiteli odhe tu kundukidha aluhe, odhi li kiinima mbyoka tatu gumu moongulu dhosikola, mehala lyokudhanena nomomagumbo getu. Oombakiteli otadhi vulu oku tu etela omikithi."

Okwa tsikile tati, "Otuna oku yoga omake getu nomeya gayela nothewa, opo tu dhipage oombakiteli, unene tuu manga inaatu lya. Osha simana wo, ngele otatu ehama tu yoge omake getu opo twaaha taandelithe oombakiteli."

Kariza sho athiki kegumbo, okwa adha he iipyakidhila noku pangela oshilongitho sha simana. "Oshike shoka wiipyakidhila nasho?" osho a pula.

He okwa yamukula ati, "Shika osho 'lyata e to iyogo'. Ohashi longithwa oku iyoga komake konima yoku longitha okandjugo, nomanga inoolya."

Kariza okwa li akumwa, okwa ti, "Oh, osho! Omulongi gwetu okwetu lombwelele kombinga yoshilongitho shika, ashike otundji inatu tseya nkene hashi longithwa. Ohashi longithwa tuu ngiini?"

He okwa yolo eta ti, "Ila popepi ndiku ulukile, mukadhona gwandje."

"Tango, lyata koshiti shika shi li pevi mpa," he osho a ti.

"Opo ihe endini lyomeya ota li tenguka noku tila omeya komake goye. Dhimbulukwa aluhe oku iyoga nothewa," ta lombwele Kariza.

Kariza okwa li anyanyukwa nokwa ti, "Shika okwa li tandishi tseya ngiini andola okwali ihaandi pulapula? Osho shili nani oku pula otaku ningi omuntu omunawino."