Kariza okwa li e hole oku pula omapulo. Onghedi ei okwe i li honga kovakulunhu vaye. Ovali hava ti, "Ngeenge owa pula omapulo manga wumunini, oto ka kala una ounongo uhapu ngeenge wakulu."

Efiku limwe, Kariza okwa pula omuhongi waye, "Omolwashike ovakulunhu vetu have tu lombwele tu likoshe keenyala manga inatu lya, doo fimbo limwe ohadi kala tadi monika diyela?"

Ovanafikola vakwao okwa li va panda epulo eli. Navo kava li ve hole okulombwelwa ve likoshe keenyala.

Omuhongi okwa nyamukula, "Kariza, epulo olo oliwa unene. Nande eenyala detu otadi ulike diyela, ohashi dulika di kale dina eembakiteli."

Okwa fatulula tati, "Eembakiteli ohadi eta omikifi. Itatu dulu oku di mona nomesho etu oo aeke, otwa pumbwa oshilongifo eshi tashi dulu oku tu kwafela tu di mone."

Omuhongi okwa kufa omicroscope moshikopa. "Omicroscope oshilongifo osho hatu longifa opo tu tale ounima ovo vanini itava dulu oku monika komesho etu," osho a ti.

Omuhongi okwa kufa okati ndee te ka nyayifa peke laKariza, nokudja opo okati oko okwe ka xwa kokakende koku konaakonifa.

Omuhongi okwa tula okakende komicroscope, ndele eshi va tala mokambululu koku talela, ova mona mo eembakiteli.

Nonande eenyala daKariza kakwa li tadi ulike da kaka, okwa li dina eembakiteli.

"Eembakiteli odi li keshe pamwe, koinima ei hatu kumu mongulufikola, monhele yokudanauka ile keumbo. Otadi dulu oku tu etela omikifi." omuhongi ta kunghilile.

Ta twikile, "Opo nee tu dipaye eembakiteli edi, otwa pumbwa oku likosha keenyala nomeva mayela ena ofewa, unene tuu manga ina tu lya. Nongee hatu ehama otuna oku likosha keenyala opo tu ha tandavelife eembakiteli."

Eshi a fika keumbo, Kariza okwa hanga xe elipyakidila noshiima shemulimbililika. "Oshike osho welipyakidila nasho?"

"Eshi ohashi ifanwa okalikoshelo (lyata ko u likoshe)," xe osho a ti. "Ohashi longifwa oku likosha keenyala konima yokulongifa okandjuwo, nomanga ino lya."

Kariza okwa uda nawa ndele ta ti, "Oh osho! Omuhongi wetu okwe tu lombwela kombinga yoshinima eshi, ashike vahapu vomufye katu shi shii kutya ohashi longifwa ngahelipi. Oha shi longifwa ngahelipi hano?"

Xe okwa yola ndele ta ti, "Ehena apa ndi ku ulikile kaadona kange."

"Tete, lyata koshiti eshi shi li pedu apa," xe osho a ti.

"Shima wa lyata ko, endjini lomeya otali endama ndele ta li tile omeva keenyala doye. Ino dimbwa oku likosha nofewa," ta lombwele Kariza.

Kariza okwa li a hafa unene nokwe li popila ta ti, "Ngeno mbela okwa li ina ndi pula omapulo, ngeno onde shi shiiva ngahelipi? Mboli oku pula ohamu di eshiivo."