Kariza o rata go botšiša dipotšišo. O tšeetše tlwaelo ye go batswadi ba gagwe.

Ba be ba mmotša ka mehla go re, "Ge o sa botšiše dipotšišo o sa le yo monnyane, o ile go gola e le wena motho wa go hloka šedi!"

Ka letšatši le lengwe, Kariza o ile a botšiša morutiši wa gagwe, "Ke ka lebaka la eng batswadi ba rena ba re botša gore re hlape matsogo a rena pele re eja ka mehla, le ge matsogo a rena a lebelelega a hlwekile?"

Baithuti ka yena ba ile ba rata potšišo yeo. Le bona ba be ba sa rate go botšwa gore ba hlape matsogo a bona.

Morutiši a araba, "Yeo ke potšišo ye botse, Kariza. Le ge matsogo a rena a lebelelega a hlwekile, a ka kgona go ba le ditwatši."

A hlaloša, "Ditwatši di hlola malwetši. Re ka se kgone go bona ditwatši ka go šomiša mahlo a rena, re hloka selo se maatla kudu go bona ditwatši."

Morutiši o tšeere 'microscope' ka khapoteng. "'Microscope' ke sedirišwa seo re se šomišago go bona dilo tše dinnyane kudu tšeo mahlo a rena a ka se kgonego go di bona," a realo.

Morutiši a gohla matsogo a Kariza ka boleta ka phatana gomme a e phumola godimo ga slaete sa 'microscope'.

Morutiši a bea slaete godimo ga 'microscope' gomme ba bona dilo tšeo di latelago ka seboni.

Le ge matsogo a Kariza a be a se na ditšhila, go be go na le ditwatši godimo ga wona.

Ditwatši di re dikologile gohle, godimo ga dilo tšeo re di kgomago ka phapošing, lepatlelong la dipapadi goba ka gae. Ditwatši tše di ka re lwatša kudu," morutiši wa bona a ba lemoša ka tsela yeo.

A tšwela pele ka go re, "Go bolaya ditwatši tše, re swanetše go hlapa matsogo a rena ka meetse a go hlweka le sesepe, kudu pele re eja dijo. Gape le ge re lwala, re swanetše go hlapa matsogo a rena gore re se ke ra phatlalatša ditwatši."

Ge Kariza a fihla gae, a hwetša tatagwe a dira sedirišwa sa go kgahliša. "Na o dira eng?" A botšiša.

Selo se se bitšwa 'kandagirukarabe' (gata godimo o hlape)," tatagwe a realo. "O se šomiša go hlapa matsogo a gago ge o etšwa ntlwaneng, le pele o eja dijo."

Kariza o ile a makala a re, "Ka nnete! Morutiši wa rena o re boditše ka sedirišwa se, efela bontši bja rena ga re kgone go se šomiša. Na se šoma bjang?"

Tatagwe O ile a sega a re go yena, "Batamela kgauswi ke tla go laetša, ngwanaka."

"Sa mathomo, gata godimo ga seripana sa kota mo lebatong," tatagwe a realo.

"Morago ga fao setšhelo sa meetse se tla sekama gomme sa tšhela meetse ka matsogong a gago. Gopola go hlapa ka sesepe," a botša Kariza.

Kariza o be a thabile gomme a re, "Ke be ke tla tseba bjang ge nkabe ke sa botšiša dipotšišo? Ke nnete gore dipotšišo di iša tsebong."