Go be go na le mošemane yoo leina la gagwe e bego e le Abele. O ile a itirela karikana.

Abele o be a se na mootledi wa karikana ya gagwe ye mpsha. O ile a re go sesi wa gagwe, "Meri, ke hloka mootledi wa karikana ya ka. Ke kgopela gore o mphe mpopi wa gago. Mpopi o ka dula ka mo karikaneng."

Efela Meri a re, "Aowa, ke nyaka mpopi wa ka." Ge Meri a gana go mo fa mpopi, Abele a befelwa kudu. A swara mpopi a o goga.

Meri le yena a goga letsogo le lengwe la mpopi. Abele a goga ka thoko ye mola Meri a goga ka lehlakoreng le lengwe. Letsogo la mpopi la kgaoga.

Meri o ile a lla a kitimela go mmagwe. "Mma bona," a realo, "Abele o gogile letsogo la mpopi wa ka le kgaogile. O be a nyaka gore mpopi wa ka o dule ka karikaneng ya gagwe ye mpsha efela nna ke be ke nyaka go raloka le mpopi."

Mmagwe a re, "Abele ga se a itshwara gabotse."

Mmagwe o ile a gopola ka mokgwa wa go ruta morwa wa gagwe go hlokomologa dibapadišane tša sesi wa gagwe. O ile a tlelwa ke leano.

O ile a ya go mogwera wa gagwe yoo e bego e le ngaka gomme a mmotšiša, "Ke hloka thušo ya gago hle." Ngaka ya fetola, "Nka go thuša bjang mogwera wa ka?"

Mmagwe a araba, "Morwa wa ka Abele ga a itshware gabotse matšatši a. O gogile mpopi wa sesi wa gagwe ka letsogo gomme la kgaoga. Ga se a swanela go dira ka tsela yela.

Ke tla mmotša gore gosasa a tliše mpopi go wena gomme o bušetše letsogo la mpopi madulong a lona."

"Ke kgopela gore o botše Abele gore o swanetše a go lefele mošomo woo o tlago go o dira. Ga a na le ge e ka ba sente, ka gorealo, o tla mmotša gore a hlatswe koloi ya gago ye kgolo ya kgale yeo e phelago e na le marole," mmagwe a realo.

Mogwera wa gagwe a sega gomme a re, "Ee-ee! Seo e tla ba taba ye botse."

Mmago Abele o ile a boela gae. Ge a fihla a botšiša Abele a re, "Na ge o lwala goba o e kwa bohloko o ya kae? Abele a araba ka go re, "Ge ke lwala goba ke e kwa bohloko ke swanetše go ya ngakeng."

Mmago Abele a re, "O gobaditše mpopi, bjale o swanetše go iša mpopi ngakeng."

Abele o ile a iša mpopi ngakeng. "Mpopi wo o gobetše kudu. Mma o rile ke o tliše go wena. Ngaka, na o ka kgona go fa mpopi letsogo le leswa?"

Ngaka e ile ya dumela go alafa mpopi. Mpopi o ile wa fiwa letsogo le leswa.

Ngaka e ile ya re go Abele, "Mpopi o na le letsogo le leswa. O swanetše go lefela mošomo wa ka. Na o na le bokae?"

Abele a fetola ka go re, "Ka kgopelo hle ngaka, ga ke na le ge e ka ba sente. Nka se kgone go lefela mošomo wa gago."

10 Ngaka a re, "Bjale ge! Ga o na tšhelete? Koloi ya ka ye kgolo e na le ditšhila kudu! Hlatswa koloi ya ka, seo e tla ba tefo ya mošomo wa ka."

Abele a tšea pakete ya meetse le lešela la go hlweka. Go ile gwa tšea nako ye telele go hlatswa koloi yeo ya ditšhila.

Morago ga fao Abele a bušetša mpopi go Meri. O be a thabile gomme a re go Abele, "O buti wa go loka. Ke leboga ge o lokišitše mpopi wa ka."

"Sesi wa ka, ke maswabi go befelwa ka tsela yela ka ba ka go nyamiša," Abele a realo.

Go tloga ka lona letšatši leo, Abele o ile a gomela go tšea dilo tša sesi wa gagwe gape. O ile a leka ka maatla go se sa befelela sesi wa gagwe.

Abele o ile a gopola nako ye telele yeo a e tšerego go hlatswa koloi ye kgolo, ya ditšhila ya ngaka. A tšea sephetho sa go re, go be go se na mohola wa go befelwa le go thuba dilo.