Alo karu eche, tong'opa ng'akipi nikooyan sodi akamu talalaar noi. Apotu ng'ang'ololin daang tooko kidong a ang'olol apiaro.

Abu akure kirikaa ng'ibaren tanyaras daang.

Abu Ekaal kianak eking'aren, "Iyenete esi daang atamar kinyamit akure na aoko ng'ang'ololin daang, edong ang'olol a apiaro bon na elona noi. Nyo ni kisubakini?"

Tama Aparas, "Kilosi sua ng'iche nang'olol a apiaro atamata ng'akipi ainutu luche."

Tatach Aite, "Eloona nooi. Asait na kibong'unio ng'on ana ng'olol kiriemuni luedongo ketoka."

Tamaa Amesek, "Maa, maa! Alosi ayong nang'olol a apiaro atamat ng'akipi."

Topor Akine kidiama tamaa, "Meee, meee! Alosi ayong dee nang'olol a apiaro."

Tamaa Ekukut, "Keer, ker ker ker! Alosi ayong dee nang'olol a apiaro."

Asakete ng'ibaren daang alosere. King'arenik Ekaal keci.

Agogong alosere inaa. Tarau Atapen lo a esal. "Talopaikang, nyapedero ayong nabo akilot nang'olol a apiaro," tolim Atapen.

Kiliko Ekukut Atapen.

Torotokis ng'aren. Tamaa Ekukut, "Kabur ayong, nyasaki nabo alosere nang'olol a apiaro."

Kiliko Amesek Ekukut.

Aloset ng'aren, abu Amesek dee tobur.

Tamaa Amesek, "Kabur. Nasaki alothere nabo nang'olol a apiaro."

Kiliko Akine Amesek.

Aniering'a elosete tobur Akine alosere nang'olol. Abu Aparas toliko Akine.

Na aburunia Aparas alosere nang'olol, kiliko Aite ng'esi.

Naapiyoria Aite alosit ng'aren, king'olia Ekaal kiliko ng'esi.

Na edongio arai ng'esi bon, abu Ekaal kirichakin tanangia nang'olol a apiaro.

Abu Ekaal tanang eburunit.

Anangunet, teper Ekaal telek Aite.

Tolek Aite Aparas. Tolek Aparas Akine.

Tolek Akine Amesek. Tolek Amesek Ekukut na tolek Ekukut Atapen.

Na kong'ina ng'esi apedoreeta ng'ibaren daang akimat ng'akipi anang'olol a apiaro.