Kariza bekakutsandza kubuta imibuto. Wafundza lomkhuba kubatali bakhe. Bebavame kumtjela kutsi, "Nangabe ungabuti imibuto ngesikhatsi usemncane, uyokhula ube ngumuntfu lomdzala longenalo lwati!"

Ngalelinye lilanga, Kariza wabuta thishela wakhe, "Kungani batali betfu basitjela njalo kutsi sibogeza tandla tetfu ngaphambi kwekutsi sidle, ngisho nobe tandla tetfu tibonakala tihlobile?"

Bantfwana lafundza nabo bawutsandza umbuto wakhe. Phela nabo bebangakutsandzi kutjelwa kutsi babogeza tandla.

Thishela waphendvula, "Lowo ngumbuto lomuhle, Kariza. Ngisho nobe tandla tetfu tibonakala tihlobile, kusenekwenteka kutsi tisenawo emagciwane."

Wachaza, "Emagciwane abanga tifo. Ngeke siwabone emagciwane ngemehlo etfu kuphela, sidzinga lokutsite lokunemandla kakhulu kute sibone emagciwane."

Thishela wakhipha sipopola lebesisekhabetheni. Watsi, "Sipopola lithulusi lesilisebentisako kute sibone tintfo letincane kakhulu kutsi singatibona ngemehlo etfu."

Thishela watihwaya ngebunono asebentisa indvuku tandla taKariza wabese uyesulela esibukweni sesipopola.

Thishela wabeka sibuko esipopolweni futsi nguloku labakubona ngeliso lekubuka.

Ngisho nakuba tandla taKariza betibonakala tingakangcoli, bekunemagciwane kuto.

Thishela wabo wabecwayisa, "Kunemagciwane kuyo yonkhe indzawo lesitungeletile, etintfweni lesititsintsako egumbini letfu lekufundzela, enkundleni yakudlala noma ekhaya. Lamagciwane angasenta sigule kakhulu."

Wachubeka, "Kute sibulale lamagciwane, sidzinga kugeza tandla tetfu ngemanti lahlantekile nangensipho, ikakhulu ngaphambi kwekutsi sidle.

Lokunye futsi, nangabe sigula kufanele sigeze tandla tetfu kute singasabalalisi emagciwane."

Nakefika ekhaya, Kariza watfola babe wakhe enta lithulusi lelihle. Wabuta watsi, "Yini lena loyentako?"

"Lomshini ubitwa ngekutsi ngu-'kandagirukarabe' (ngugibela bese uyageza)," kwasho babe wakhe. "Uwusebentisa kute ugeze tandla takho ngemva kwekuya emthoyi nangaphambi kwekudla."

Kariza wamangala wase utsi, "Oh ngiyabona! Thishela wetfu usitjele ngalelithulusi, kodvwa labanyenti betfu bebangati kutsi lisetjentiswa kanjani. Lisebenta kanjani?"

Wahleka wase umtjela kutsi, "Sondzela lapha ngitokukhombisa, ndvodzakati yami."

"Kwekucala, gibela kulelipulangwe leliphansi," kusho babe.

"Khona-le sicukatsi semanti sitawutjeka bese sicitsela emanti etandleni takho. Khumbula kugeza ngensipho," watjela Kariza.

Kariza wajabula kakhulu futsi watsi, "Bengitokwati kanjani loku ngaphandle kwekutsi ngibute imibuto? Kuliciniso kutsi imibuto yenta umuntfu abe nelwati."