Bekunemfana libito lakhe bekungu-Abel. Watakhela inkalishi.

Abel bekete umshayeli wenkalishi yakhe lensha. Watsi kudzadzewabo Meri, "Ngifuna umshayeli wenkalishi yami. Ngicela unginike umdoli wakho. Utawuhlala enkalishini."

Kodvwa Meri watsi, "Cha, ngifuna umdoli wami." Ngesikhatsi Meri angavumi kutsi atsatse umdoli, Abel watfukutsela kakhulu. Wabamba lomdoli wase uyawudvonsa.

Meri wadvonsa umkhono lomunye wemdoli. Abel wadvonsa naMeri wadvonsa. Umkhono wemdoli waphuma!

Meri wakhala, wagijima waya kumake wakhe. Watsi, "Buka Make, Abel udvonse umkhono wemdoli wami wase uyaphuma. Bekafuna umdoli wami kutsi uhlale enkalishini yakhe lensha kepha mine bengifuna kudlala ngawo."

Make wakhe watsi, "Abel wente kabi."

Make wacabanga indlela yekufundzisa indvodzana yakhe kutsi ingawatsintsi emathoyisi adzadzewabo. Watfola lichinga.

Waya kumngani wakhe labengudokotela wase uyamcela, "Ngicela ungisite." Dokotela waphendvula, "Ngingakusita ngani, mngani wami?"

Make waphendvula, "Indvodzana yami Abel akatiphatsi kahle kulamalanga. Udzabule umkhono wemdoli wadzadzewabo. Akufuneki ente kanjalo.

Kusasa ngitomtjela kutsi aletse lomdoli kuwe kute uphindze ubuyisele umkhono wawo."

Make watsi, "Ngicela utjele Abel kutsi kufanele akubhadale ngemsebenti wakho. Ute imali, ngako utomtjela kutsi akageze lemoto yakho lendzala lenkhulu lehlala ingcolile."

Umngani wakhe wahleka wase utsi, "Ee-ee! Loko kutawuba kahle."

Make wa-Abel wabuyela emuva ekhaya. Wabuta Abel, "Nangabe ugula noma ulimele kukuphi lapho uya khona?" Abel waphendvula, "Nangigula noma ngilimele, ngiya kudokotela."

Make wa-Abel watsi, "Ulimete umdoli, nyalo kufanele uwutsatse uye kudokotela."

Ngako Abel watsatsa umdolo wawuyisa kudokotela. Watsi, "Lomdoli ulimele kakhulu. Make ungitjele kutsi ngiwuletse lapha kuwe. Dokotela, ungakhona yini kuwentela umkhono lomusha?"

Dokotela wavuma kutsi awubuke umdoli. Wakwati kuwentela umkhono lomusha.

Dokotela watsi ku-Abel, "Umdoli sewunemkhono lomusha. Kufanele ungibhadale. Unamalini?"

Abel waphendvula, "Ngiyacela dokotela, anginayo imali. Ngeke ngikwati kukubhadala ngemsebenti wakho."

Dokotela watsi, "Kulungile! Awunayo imali? Imoto yami lenkhulu ingcole kakhulu! Washa imoto yami futsi ngileyo indlela lotongibhadala ngayo."

Abel watsatsa libhakede lemanti kanye nendwangu lehlobile. Kwamtsatsa sikhatsi lesidze kuwasha leyo moto lengcolile.

Abel wase utsatsa lomdoli wawubuyisela kuMeri. Meri wajabula kakhulu wase utsi ku-Abel, "Ungubhuti lokahle. Ngiyabonga ngekulungisa umdoli wami."

Abel watsi, "Dzadzewetfu, ngiyacolisa ngekutfukutsela nekukuphatsa kabi."

Kusukela ngalelo langa, Abel akazange aphindze atsatse tintfo tadzadzewabo. Futsi wetama ngako konkhe lokusemandleni akhe kutsi angamtfukutseleli.

Abel bekakhumbula kutsi kwamtsatsa sikhatsi lesidze kangakanani kuwasha imoto lenkhulu lengcolile yadokotela. Wabona kutsi akusiti kutfukutsela nekuphula tintfo.