Kolong alo Kangitit, ayei idia anyaritae Ekiru.

Pe amina ng'esi akisuam kori tani anganyar abuk. Arai ng'esi idia nikalany'. Nabo arono eboyor keng'.

Akokoyiene Ekiru ng'aropiyae Aitekeng' togielea ngitamtamea. Tani na iwuaya itiekeng' ngaropiyae, eyanyuni tolema.

Ne erumoria akinyam ngitamtamea, tolot Ekiru abolia ka ngipaalon keng'.

Angirwa kidio, abu Ekiru tojongo alosit losukul. Kiboyi apaaran dang' ebolia ng'esi, tobong'u nawi ebong.

Abu itiekeng' toriangakin naanyuwaria ngakiro nu.

"Agelaner eboyor aidiayok. Ngayieni tani kelosene losukul. Nabo tokokoi ngaropiyae kang," tolim itiekeng Ekiru.

Kitamak Apakeng eger lo ilokonyio eboyor Ekiru.

Tolimok aberu keng', "Achie kwar, kidaik ngaropiyae toma nakitab. Kotere ngenganyanari tani ngakitabia, kongina ngeanyuwari ng'esi."

Akwaar nache, tasaka Ekiru ngaropiyae aitiekeng'. Tasak wadaang' nabo nianyuna.

Abu totiauk ayakar lomakit loapi akisak ngaropiyae.

Abu apakeng kingolik ni alosi Ekiru.

Tolim tama, "Lokokang, ayeniang ibore ni isakarit iyong alomakit. Tobongo kai taany' ngaripiyae anakitabia."

Abu Ekiru toriangakin ani erumor, tayaka akisak ngaropiyae anakitabia.

Abu tany ngaropiyae naedait itiekeng'.

Akwar nachie, tasaka nabo nakitabia. Torukau emam ibore.

Tayaka akingitun anikapakeng nyio emakatar ngaropiyae anakitabia.

Abu apakeng tomaisien tolimok tama, "Lokokang, isaki ayanyun ngaropiyae naitemokino togialea ngitamtamia lukaalak?"

Tolim Ekiru tama, "Eeh, Apa."

Tolimok Apa'keng, "Topupok lokookang. Kisoma ngakitabia kon ani erumor tolot losukul. Iyanyuni iyong ebacit loajokon anakitabia. Niyar etau."

"Apa, egogong robo akisuam. Kituburunete ngakitabia!" tolim Ekiru.

Alongisat, tachakin Apakeng Ekiru. Kitamak eger lo einakinia lokokeng etau.

Tolimok lokokeng tama, "Esomota chen kaapei. Kengarakin ayong iyong aanyun ebari anakitabia."