Mengwageng ye mentši ya go feta, diphiri di be di bolawa ke tlala. Ka lebaka la tlala yeo, dipudi, dinku le dikgomo di ile tša hudugela mafelong a mangwe. Diphiri di be di se na dijo.

Di kgobokane lefelong le le lengwe gore di boledišane ka taba ye.

Ye nngwe ya diphiri ya re, "Ka setšo sa rena, re ja se sengwe le se sengwe se se tšhabago. Bona, maru a a a tšhaba."

Phiri ye e be e dumela gore maru a be a hudugela lefelong le lengwe. Ya re, "A re a jeng."

Ka pela pela, diphiri ka moka tša lebelela godimo gomme tša bona maru a sepela lefaufaung.

Ye nngwe ya diphiri tše nnyane ya botšiša ya re, "Re tla fihla bjang marung? A kgole kudu le lefase."

Phiri ye kgolo ya go di feta ka moka ya re, "E re phiri ya go tia e eme mobung gomme rena ba bangwe re eme mekokotlong ya tše dingwe. Ge re dutše re namelana mekokotlong re tla ba ra fihla marung."

Tša dumelelana gomme tša thoma go namelana mekokotlong.

Ka moragonyana go be go se sana phiri ye e šetšego mobung ntle le yela ya senatla.

Morago ga ge phiri ya mafelelo e seno namela, yela ya senatla ye e bego e le mobung ya nagana gore tše dingwe di šetše di thomile go ja.

Ya botšiša ya re, "Gobaneng le sa nngwathele tše dingwe tša dijo tše le di jago?"

Eupša diphiri tša se fihlelele marung.

Ga se di hwetše dijo ka gona di be di se na selo seo di ka se fago phiri ya senatla yeo e emego mobung.

Phiri ya senatla e ile ya fela pelo gomme ya emela ka thoko. Tše dingwe diphiri di ile tša wela fase ka letsogong la go ja.

Ka lona lebaka leo, le go fihla lehono diphiri ka moka di hlotša ka letsogong la go ja.