Kgalekgale go be go na le lapa la go ba le polase ye kgolo. Ba be ba na le ditloo tše dintši le mafela polaseng ya bona.

Diphoofolo ka moka tša maoto a mane di be di eya polaseng yeo go yo ja dimela.

Mmutla o be o hlalefile kudu. O be o kgona go bona beng polase ge ba sa le kgole.

O be a re ge a bona beng polase a goeletša a re, "Bahlakodi! Bahlakodi!" gomme diphoofolo di tšhabe ka lebelo.

Ge nako e dutše e eya, ba lapa ba ile ba lemoga gore dibjalo tša bona di a jewa.

Ba napa ba bea popi ye kgolo gore e tšhošetše dipoofolo le go šireletša polase. Ba ile ba bea segomaretši mmeleng wa popi ka moka.

Ka letšatši le le latelago, diphoofolo tša ya tšhemong gomme tša bona popi. Di ile tša boela morago ka gobane di be di nagana gore popi e tlo di swara.

Popi e tšhošitše diphoofolo ka moka ntle le mmutla. Mmutla o boeletše tšhemong ka letšatši le le latelago.

Mmutla wa fihla go popi wa re, "Ge nka go otla ka letsogo la ka la go ja, o tlo hwa!"

Mmutla wa otla popi gomme letsogo la go ja la kgomarela.

Bjale mmutla wa re go popi, "Ge nka go otla ka letsogo la ka la nngele, o tlo hwa!"

Mmutla wa otla popi ka letsogo la nngele a kgomarela.

Mmutla wa re go popi, "Ge nka go raga ka maoto a ka, o tla hwa!"

Mmutla wa raga popi gomme maoto a kgomarela go yona.

Mmutla wa tšwela pele ka gore, "Ge nka go thula ka hlogo, o tla hwa!"

Hlogo ya mmutla ya kgomarela go popi.

Bjale mmele wa mmutla ka moka o be o kgomaretše go popi.

Ka lona letšatši leo, beng polase le morwedi wa bona yo monnyane ba ile ba ya tšhemong.

Ba humane mmutla o kgomaretše poping gomme ba fa morwedi wa bona popi yela gore a e iše gae. Ge a fihla gae, a kgopela mogolo wa gagwe gore a apee mmutla wola.

Mmutla o ile a fa basetsana ditaelo tše di šele. O rile ba swanetše ba apee mokoko wo mogolo wa ka gae.

Mmutla a iša pele ka go ba botša gore ba swanetše ba ntšhe sutu ya tatago bona.

Basetsana ba apeile mokoko. Ba neela mmutla sutu ya tatago bona, gomme ba sola dilalelo.

Mmutla o be a bea marapo a nama ka mekotleng ya sutu.

Batswadi ba fihlile gae.

Mmutla wa tšwa ka lefastere wa tšhaba.

Ba laetše dimpša tša bona gore di sware mmutla.

Ge dimpša di batamela go swara mmutla, a di fa marapo go tšwa mekotleng ya sutu ya tatago bana.

Dimpša tša ema gore di je marapo.

Mmutla wa kitima ka lebelo, go fihlela o hwetša leraga.

Mmutla wa pshikologa ka lerageng go fihlela boya bja gagwe bo khupeditšwe ke leraga. O ile a ema gona fao lerageng.

Ge batho ba fihla fao lerageng, ba se tsebe gore ke mmutla.

Ba mmotšiša ba re, "Ga se wa bona mmutla wo mokhwibidu o feta mo ka lebelo?" Mmutla wo mokhwibidu wa araba wa re, "Aowa!"

Batho ba feta ba tšwela pele ka tsela.

A ke mafelelo a kanegelo ye!