Luka 10:25-37

Nananoru, ahonwa ntaphuleli mmoca o malamulo, aaphavela untteha Yesu ni ahoolumaca eeraka: Mwalimu, kipankekeni wo wiira kiphwanye ukumi woohimala?

Vano Yesu ahomwaakhula eeraka: Yantikhiye isiyani mmalamuloni mmo?Untaphulelaka cani?

Ule ahaakhula eeraka: Waafente Apwiya Nluku aa, ni nrimaa wothene, ni irooho aa yothene, ni ikuru caa cothene ni ankhili aa othene; ni unfente nkhunanaa toko cineefentaa umwaneene.

Vano Yesu ahoolumaca eeraka: Uhaakhula ratta, wapanke ciicammo ni unaahala ukhala nkumi.

Nanso ule aphavelaka wiivirelaca, ahonkoha tho Yesu eeraka: Nkhunanaka tipani?

Yesu ahopwaherera wuulumaca eeraka:

Nlopwana mmoca aakhuma uYerusalemu aarwa uYeriko, ahokhumeleliya na anannyatha. Yahontuphelaca, yahonrulaca coowara cawe, yahomwaattakaca nuunhiya nari mmekho.

Woohipica wene phaavirawe mayasataka mmoca yeeyo iphiro iyo, umoona wawe ahonsereka.

Woolikanaca wene ahovira nLevi mmoca nenno nipuro nno, umoona wawe nuuyo ahonsereka.

Vano nSamariya mmoca aari ni ikwaha awe, ahomphwanya, umoona wawe ahomoonela uthunku.

Ahomwaattamerya ni ahorapiha makhwatta ale ni makhura ni iviinyu, nuutthukaca. Ahompakhira mpuuruni mwawe ni ahonrwana inupa yoomakiya ni ahontafiti.

Usa waya ahokumiha micurukhu miili coparatha, ni ahonvaha mwaneene inupa yaamakiya ile eeraka: Untafiti ula nlopwana ula, yakhala tho itthu inhalaa urihakaca yoopwaha ula ncurukhu ula, mi kimmooliva katuruwaka.

Yesu ahonkoha eeraka: Vano wo yaala ooraru ala, tipani nomoonaa ukhala nkhunanawe nlopwana aatupheliye na anannyatha ule?

Vano, ntaphuleli o malamulo ahomwaakhula eeraka: Yooyo moonenle uthunku uyo.

Paahi, Yesu ahomwiirela: Ni we urweke wapankeke ciicammo.