Luka 10:25-37

Ndipo ntsiku ibodzi, munthu winango omwe akhali mpfundzisi wa Mtemo adamuka kuti ayezere Jezu, ndipo adam'bvundza kuti: "Misiri! Kodi ningacite tani kuti ndidzakhale na moyo?"

Pamwepo, Jezu adamutawira aciti: "Kodi muMtemo mudanembedwa ciyani? Umbaubva tani?"

Ndipo iye adatawira aciti: "Funa Mbuya Mulungu wako na m'tima wako wentse, moyo wako wentse, mphambvu zako zentse, na ndzeru zako zentse. Ndipo funambo mwandzako ninga momwe umbabzifunira iwe wekha."

Pamwepo, Jezu adamuuza kuti: "Mwatawira bwino. Cita bzimwebzo, ndipo mun'dzakhala na moyo."

Tsono na kufuna kuwonesa ninga wakulungama, iye adabvundza Jezu kuti: "Kodi mwanzanguyo mbani?"

Ndipo Jezu adamutawira kuti:

Pakhana munthu m'bodzi omwe akhabuluka kucokera kuJerusalema acimbayenda kuJeriko. Ndipo iye adaphatidwa na akambowa. Iwo adam'khundula bzakubvala acim'menya, ndipo adacoka acimusiya atafumphira.

Tsono nyantsembe winango akhandobzipitirambo na njira, pomwe adamuwona, iye adamutsembera.

Tenepoyombo, muLevi m'bodzi adapitambo na pamwepa acimuwona, ndipo adamutsemberambo.

Tsono m'Samaliya m'bodzi, omwe akhali paulendo, pomwe adafika pakhana iyepo acimuwona, adamubvera ntsisi.

Ndipo adafendera kuna iye, acimutsuka bzironda na mafuta na vinyu acimanga bzirondabzo. Pomwe adamala, adam'pakiza pabulu. Ndipo adayenda naye kunyumba ya alendo acikamukhongobza bwino.

Mangwana yandzace, adacosa kobiri ziwiri za ndzayaya acipasa yakutambira alendo, acimuuza kuti: "Ndikhongobzerembo munthuyu. Ndipo bzentse bzomwe imwe mun'dzonga, nin'dzakulipirani pakubwerera."

Jezu adabvundza: "Kodi pa atatuwa, mun'kumbuka kuti mwandzace wa ule omwe adaphatidwa na akambowa nguponi?"

Ndipo mpfundzisi ule wa Mtemo adatawira aciti: "Mwandzace ngule omwe adamubvera ntsisi."

Ndipo Jezu adamuuza kuti: "Ndokoni mukacitembo bzibodzi-bodzi."