Luka 8:5-15

Yesu ahaahimyacera nna nlikanihero nna eeraka:

Mayowaala ahorwaa umwaca ipyo awe.

Amwacakoono, ipyo ikina yahomorela nceresere iphiro ni yahonyakelaciya, ni yaholyaaca asaanuni.

Ipyo ikina yahomorela wamakhorokoconi ni umelawaya yahooma, nlattu wo makhorokoco.

Ikina iyo yahomorela wamiiwani, ni yahonnuwa wamoca ni miiwa nnye, mpaka umiiriya.

Ikina iyo yahomorela nipuro niri itthaya yomaana; ni umela waya yaheema wo khula ipyo mihokorokho iminya.

Wuulumaca wawe commo, ahokhuwela eeraka: Ule rina manyaru owiiwa, eeweke.

Eetthuci awe yahonkoha, yiiraka: Nlikaniheroni nenna?

Yesu ahaakhula eeraka: Nyu nhovahiya ucuwela isiiri coomwene wa Nluku, nanso akina anhimyaceriya ni malikanihero, wiira awehakoono ahoone, ni yiiwakoono ahiiweehe.

Ila phi itthu inhimyaya nlikanihero: Ipyo iyo, niri nuulumo na Nluku.

Ile yaamorenle nceresere iphiro, pha ale aneewa. Wahoolo naawa sotwani ukumiha wanrimani waya nuulumo niiwilyaya nno, wiira ahikupali yoopwaaka.

Ile imorenle wamakhorokoconi, pha ale aneewa nuulumo, yaakhelaka wootteeliya, nanso ukhala wiira khaarina mitithari, ankupali ukati vakaani, ni waphiyaka ukati woottehattehiya, anaahiya.

Ile imorenle wamiiwani pha ale yiiwile nuulumo na Nluku, nanso yeettaka intthunaaya, ahomiriya ni misankiho, ni mihakhu, ni ucivaciviya wo mwiirutthuni. Vano mihokorokho caya nnyo khacinttokottha.

Ipyo imorenle nipuro niri itthaya yomaana, pha ale yiiwile nuulumo na Nluku asunkaka ni nrima wooreera ni womaana ni anawiima nhokorokho nuukhalela nthiti.