Luka 11:1-10

Ntsiku inango Jezu akhapemba pambuto ibodzi. Pomwe adamala kupembako, mteweri wace m'bodzi adamuuza kuti: "Mbuya, tipfundzisenimbo kupemba, ninga momwe Juwau akhapfundzisira ateweri wace."

Ndipo iye adawauza kuti:

"Mukapemba mbalewani kuti: Baba, dzina lanu likhale na mbiri. Umambo bwanu bubwere. Tipaseni cakudya cathu ca ntsiku zentse. Mutirekerere bzakuipa bzathu, ninga ifembo tinirekerera wale omwe ambatiphonyera. Ndipo lekani kutisiyira kuti tipumpsidwe."

Ndipo Jezu adawauza kuti—

Mbani wa imwepo omwe acikhala na xamwali wace acidzamugugudzira pakati pa usiku acimuuza kuti:

"Ndikukumbirembo pau. Nakuti ndatambira mulendo ndipo ndiribe cakumupasa."

Ndipo xamwali waceyo acimutawira ali m'nyumba kuti: "Leka kundinesa! Nakuti ine ndafunga kale msuwo. Ine na wana wangu tagona kale. Na tenepo, ine-pano ningamuke lini kuti ndidzakupase cinthu."

Tsono dziwani kuti napo akasaya kumuka kuti amupase nakuti ni xamwali wace, iye an'dzalamuka basi thangwe la kumunesa nthawe imweire. Ndipo iye an'dzamupasa bzentse bzomwe iye an'funa.

Na tenepo, ndinikuuzani kuti kumbirani, ndipo mun'dzapasidwa. Nyang'anani, ndipo mun'dzabziwona. Gugudzani, ndipo mun'dzakufunguliridwa.

Nakuti munthu wentse omwe an'kumbira ambapasidwa. Na ule omwe ambanyang'ana ambabziwona. Na ulembo omwe ambagugudza ambafunguliridwa.