Moni, ndime Ntombi. Ndi mwana musimbi mbwena mbuli bana basimbi bamwi, nokuba kuti ndijisi ciwena mumubili wangu. Inga timwamubona, pesi ndilizyi kuti nkwali. Zina lyakwe ngu Sikulinjizya Mubyabi. Uliyubide mumubili wangu pesi tanyonyoni benzuma.

Inga tazwi mumubili wangu akunjila muwako na koli munsi lyangu, na kondijatide kukwanza kwangu.

Takonzyi kuzwa mumubili wangu akukusotokela mumubili wako notwabana cisusulo andime, na koona ansi andime ciindi notupumuna.

Ciwena wangu, Sikulinjizya Mubyabi, Uli andime kuzwa nondakazyalwa. Ulayandisisya kulya basikalumamba balwana tuuka twamalwazi mumubili wangu akundikwabilila kumalwazi. Kuti na walya basikalumamba bangu banji, ndilaciswa kapati. Eci cilapa kuti kandilovwa kucikolo akutasobana abeenzuma.

Ndileelede kunywa musamu mazuba oonse muciindi comwe. Kuti cataba boobo ciwena wangu ulabuka kanyemede akulya basikalumamba bangu alimwi. Tandiyandi kuti kacita boobu, elyo ndilabayeezya bakapa kundipa musamu weelede muciindi ciyandika.

Kuti ndalya cisyumani amicelo, basikalumamba bangu balaba anguzu akutalekelela ciwena wangu kuti abajate. Ndiyeeya kuti ulaunka kukoona kwa ciindi mbocibele, nkaambo inga ndayuma akukonzya kusobana abeenzuma alimwi. Ndilakomana naunka kukoona amana ndilakonzya akusobana

Bakapa bakanditola kucibbadela ciindi cakainda kwalo nkundakapegwa cakusanina ciwena wangu. Eeci cipa kuti aone, Alimwi kuti katalyi basikalumamba bangu. Elyo ndilakonzya kucita zyintu zicita bana bamwi, mbuli kulunduka, akutanta alimwi akuzyana.

Ndabayanda bakapa kapati. Mbabotu akuloma kuli ndime. Balandipa cakulya cibotu ama bitameni apa kuti basikalumamba kababa anguzu, kupa kuti kanditaciswi. Na kuti ndaciswa balanditola kucibbadela cakufwambana ikutegwa ndipegwa musamu undiponya. Ndilayanda kuti bandoneka amabelo akundaanina twaano nketana ona.

Bamana kundoneka bakapa, ndilayeya zintu zinji. Ndilayeya zyakubala kucikolo cipati. Kuti kandi zumanana kunwa musamu upa kuti ciwena kaona, ndilakubalela bakapa akubabalila twaano bakomena kapati akutabona kabotu mbuli kaindi. Ndakuba mukaintu mupati, ndiyakuyanda kwiiya zyamisamu yanseba. Ndiyanda kuti ndikajane musamu uyakupa koona kwatuzunda tutegwa ciwena mumibili yabantu kuti tutakabuki alimwi.

Ndiya kwiiya kupona aciwena wangu akumooneka mbuli mbwecikonzya. Ndiyakuba abeenzuma banji mbwendikoonzya. Akuba aciindi cakusobana mbuli mbwendikoonzya mazuba oonse.

Bakapa, bamakaintu bazyalwa abaama, abamacisya, abeenzuma balandiyanda, nokuba kuti ndijisi ciwena utegwa Sikulinjizya Mubyabi upona mumubili wangu.