Kwarĩ na mũkũrũ wetagwa Nkũbitũ. Atũũraga na ataana bawe bathatũ.

Nkũbitũ neendete ataana bawe bethĩrwa barĩ na ũtonga nyuma ya gũkua kwawe. Arabathuranĩra mathandũkũ jathatũ.

Nkũbitũ areeta kĩrĩ mũtũũrĩ wawe Maingĩ na aramwĩra, "Ndĩenda ataana bakwa bagea ũtonga. Nĩmbathithĩrĩtie mathandũkũ jathatũ. Ndĩenda ũbanenkere mathandũkũ rĩrĩa ngakua."

Nyuma ya Nkũbitũ gũkua, Maingĩ areeta ataana amwe.

Arabera, "Abagu nĩ antigĩre mathandũkũ jaja mbere atĩrakua. O umwe akoona rĩĩtwa rĩawe rĩandĩki ĩthandũkũne. Itũ jũkia rĩrĩa rĩĩ riaku."

Ataana barajũkῖa mathandũkũ barakunũra.

Ĩthandũkũ rĩa mbere rĩarĩ na thaabu. Rĩa jaĩrĩ rĩarĩ na mũthetu. Rĩa jathatũ rĩarĩ na ntaka ya ng'ombe.

Ũria wonere thaabu aragwĩrua mono. Barĩa bangĩ baĩrĩ batagwĩrĩrue. Baraambĩria kũmũtetia.

"Bũrĩ ataanong'ina, tigeni gũteta. Kambwikie kĩrĩ mũkũrũ ũmwe ũmũme abwathe kĩrĩra," Maingĩ areera ataana bau bathatũ.

Arabaikia kĩrĩ mũkũrũ ũrĩa mũũme.

"Muuga, twĩjĩte kũromba kĩrĩra kiegie kiigai," Maingĩ areera mũkũrũ.

Maingĩ areera mũkũrũ ũmũũme mantũ ja mathandũkũ jathatũ jarĩa Nkũbitũ atigĩrĩte ataana bawe.

"Nandĩ kabagũteta niuntũ bwa ũũjũ ũrĩ na thaabu," Maingĩ araereca.

Mũkũrũ ũmũũme araiinyĩria, "Abagu nĩ arĩ na gĩtũmi gũtigĩra o ũmwe ĩthandũkũ rĩawe."

Areeta na mbere kũũga, "Ũrĩa ũrĩ na thaabu, abagu arĩenda waa mũbiashara. Ũrĩa woonere muthetu abagu arĩenda waa mũrĩmi."

"Ũrĩa wajũkĩrie ntaka ya ng'ombe abagu arĩenda waa mũrĩthi wa ng'ombe. Abagu eendete o umwe ethĩrwe arĩ na ngũgĩ yawe," mũkũrũ ũmũũme ararĩĩkĩa kuuga.

Nyuma ya kuthiikĩra kĩrĩra kĩa mũkũrũ ũmũũme baretĩkanĩria. Bararita o muntũ ngũgĩ yawe na baratũũra bagwĩritue.