Kgale, kgale, Letšatši, Ngwedi, Pula le Moya ba be ba elwa.

Bothata e be e le gore Letšatši le be le nyaka go hlaba mosegare ka moka. Ngwedi wona o be o nyaka go benyabenya letšatši le lengwe le le lengwe. Pula yona e be e nyaka go na letšatši le lengwe le le lengwe mola Moya wona o be o kganyoga go foka letšatši le lengwe le le lengwe. Ba be ba sa nyake go fana sebaka.

Ba ile ba tšea sephetho sa go re ba dule fase mmogo gomme ba rerišane ka bothata bjo. Letšatši le ile la botšiša Ngwedi la re, "Ke eng seo o se dirago seo se thušago lefase?" Ngwedi wa araba, "Ke bonegela diphoofolo bošego gore di kgone go tsoma."

Ngwedi wa botšiša Pula, "Ke eng seo o se dirago seo se thušago lefase?" Pula ya araba, "Ke thuša lefase ka go le fa meetse gore mehlare le dimela di gole gabotse. Ke fa diphoofolo meetse gore di nwe."

Pula ya botšiša Moya ya re, "Ke eng seo o se dirago seo se thušago lefase?" Moya wa araba ka go re, "Nna ke swiela lefase la šala le hlwekile. Ke phatlalatša pula le lefase le ka moka."

Moya wa botšiša Letšatši, "Ke eng seo o se dirago seo se thušago lefase?" Letšatši la araba la re, "Ke fa lefase seetša le borutho gore diphoofolo le dimela di kgone go phela."

Letšatši, Ngwedi, Pula le Moya ba ile ba theeletšana ka šedi.

Letšatši la re, "Ke nnete go re yo mongwe le yo mongwe wa rena o thuša lefase ka tsela ya gagwe ya go ikgetha." "Ee, Ngwedi wa realo, "Ga go na yoo a lego yo mokaone go phala ba bangwe." "Re ka šoma mmogo," gwa realo Pula. Moya wona wa re, "Bjale a re abelaneng matšatši." Ba ile ba dumelelana ka kgopolo yeo ka moka.

Ke ka lebaka leo o bonago ngwedi ka dinako tše dingwe ge letšatši le hlabile. Gape ka dinako tše dingwe o kwa go foka moya ge pula e ena. Letšatši, Ngwedi, Pula le Moya ba šoma gabotse mmogo. Ba a kwešišana.

Na o rata letšatši, ngwedi, pula le moya? Dira kgetho ya gago ka go thala seswantšho sa seo o se ratago magareng ga tšona.

Re hloka lefase gore re phele mo go lona. Lefase le re fa dijo, madulo, diphoofolo le dimela. Ka moka ga tšona di re thuša ka tsela ye e itšego. Le rena ka moka re ka dira se sengwe go thuša lefase la rena. Na o ka dira eng go thuša lefase? Ngwala seo o ka thušago lefase ka sona fase.