Yin laa Tamarye kusunyi Sǝgadǝbe cinato. Sǝgadǝ kura laaro lizǝ walgono. Sǝgadǝdǝbe zawalnzǝ kotǝbe zakkono.

Tamarye Sǝgadǝga tambarijya sǝragǝna. Mashinzǝbero lewono. "Martǝgono banasǝnowo Sǝgadǝ nuiga tambarnge. Zawalnyiga zaksǝna," wono Tamarye. Kamuwa indidǝbe zuzuadaso, amma Sǝgadǝ shimadǝ zuturo wawono.

Dongolibe lega. "Martǝne banasane Sǝgadǝ Tamarye tambartǝro!" sandiya longoroata. Dongoli sandiga bana kadio. Kamuwa yakkǝye zuzuadaso Sǝgadǝ tambartǝye, amma kuwa yaye Sǝgadǝ tǝgǝndǝnyi wawono. "Awo dikinnama nogǝnyi," wono Tamarye.

Sadǝman Kulo Tamarbero kǝnji laa isǝ karago. Kǝnanzǝa. Sǝgadǝ kura laadǝga gǝro badiwono. "Dane," wono Sǝgadǝdǝye. Amma kǝnjidǝ waltǝ jigǝro.

"Dane! Wuga takukulsǝmin," wono Sǝgadǝye. "Naakǝnyi." Daji Sǝgadǝ fǝrtǝ kaubero tambargatǝgǝ.

Sǝgadǝye balbal laa fǝrtǝ kauben dawono. Sunyiwa indi shiga sawandi. "Abi Sǝgadǝ adǝro diyen," sandiye coworo. "Kolle shiga," gada, "kǝjijin" gada gǝrǝye.

Sunyidǝye kau kura laa goza sutsaiya Sǝgadǝ katin sa nyagada.

"A'a!" Sǝgadǝdǝye kairo. Farza ngowogada. Daji Sǝgadǝdǝ katǝ badiwono.

Suro Sǝgadǝdǝben awo ritǝramma ciluwo. Awodǝ muskonzǝ fal shimnzǝ fal shinzǝ ye fal. Zauro kururam battia. "Wandowo kassuwi," wono awodǝye kowo farakkan. "Wuma mai Sǝgadǝye." Cabe dǝgai Sǝgadǝ waltǝ zakkatǝgǝ.

Sunyidǝye zaumaro rigataro walzai. Fatoro sagesǝ walta amza kuraro hawarajaa. "Wai! Zaraptiye!" amza kurawa ye. "Hawar awo ritǝramma sagǝdeye nonǝwi wa"? Shidǝ sagadǝ taganesye laa "camman nandiye shiga kollowo."

"Baliminna Sǝgadǝdǝ waltǝ katin. Daji awo ritǝrammaye kusunyi sǝgadǝye bǝladeya sammaro tarzǝyin. Andeye ngǝwu fandiyen, Sǝgadǝbe ngǝwu buiyen." Am kurawa sunyiwabedǝye gulgada.

Adǝma biyila baliminnayedǝn. Tamarye Sǝgadǝnzǝ suronzǝn zauro kusunyi ngalwo ngalwo ngǝwuwa.

Sǝgadǝ rigataye culowo. Shinzǝ faldǝ zǝwa kǝla Sǝgadǝdǝn cilowo. Shimzǝ faldǝn baye bǝladeyabe sammaga curo. Muskonzǝ faldǝn kunsunyidǝga zǝrǝgǝ sammaro tarjiwo.

Kusunyidǝ zǝregǝ kǝliwa sammayen Sǝgadǝ kura ngalwo laaro liwono. Binǝm adǝn bǝladeyadǝn wunduso Sǝgadǝnzǝ kǝmbubea fasakro walwono. Tamaryero leza, "Askǝrnyina Tamar," andega bowosammaro, ada.