Zaman laan, kam laa shiro Fandikiya gulzain mbeji. Bǝla koromarin karga. Shi-a kǝrinzǝ-a fato culluwu laan kǝnǝngatain.

Yim laa Fandikiya dondiwono. Wunduma shiga ragǝntǝma ba. Sa ngazǝnan, shiye shawargatǝ, kamu bǝla mashinzabe nyiyajinro.

Sawawanzǝ-a yanzanana-a dozǝ kǝlele lorusabe sado, Fandikiya zauro kurnotǝna dalinzǝdǝ banama sǝwandǝnaro.

Awowa kada ala barga sǝkkǝ kamu-a kwa-asoro sawudǝna. Alamanna buwu argǝmbeso bǝjiso koljiso kuru kalwo katunobeso samma banaro sawudǝna.

Kǝlele lorusabe dazǝ kusotawa fanza fanzaro walgata. Fandikiya kǝnǝnga bǝlin badijin shi-a lorusanzǝ-a kǝrin-aro cap dawartǝna.

Wazǝnanzǝga, Fandikiya awowa cin karǝgǝ kamunzǝro ciwudo, amma kǝmburo kamunzǝdǝ wawono.

Sa Fandikiya bararo suluwunan, kamudǝye awowa cin karǝgǝndǝ samma jiwo.

Fandikiya baran waltǝnan kuru shi kǝnanzǝa. Shiye awowa cin karǝgǝn mǝradǝwono. Kamudǝye kǝridǝ shima samma zǝwo! Wono.

Wazǝnanzǝa, Fandikiya kuloro lewono. Sa fatoro isǝnan, kamudǝye dadǝ samma zǝgǝrǝna najiwo. Kǝridǝmaro afima cinyi.

Waltǝ wazǝnanazǝga ye, Fandikiya sawanzǝbero ziyararo lewono, sa isǝnan, kamudǝye koljidǝ samma zǝgǝrǝna. Kǝndaidǝ de sǝl bongar kolgata. Fandikiya kamunzǝ bǝlindǝro gǝrajiwo.

Fandikiyaye zangono, kamudǝn awo laa bajinbaro. Shiye nzundunzǝ laa kundoro nyawono. Akunnamnzǝ laan nzunduzǝ cam suro njeben gǝnawono, njedǝga sǝdiya diyalben gǝnazǝ, daji bararo culuwo.

Kamudǝye njedǝga suri, camlan camber tǝmbulina. Ci tiloaro, njedǝ kǝdak hapsǝ cinzǝro gǝnajiwo. Camdǝga samma ca, kǝridǝ shiga lawarjin.

Sa banzǝdǝn, njedǝ cinzǝro kǝrgatǝgǝ. Njedǝga njikcin sǝ ngǝnǝpkatǝ mowonzǝ. Shiye yilwono, fartǝna surinnaro. Amma njedǝ kǝrgata. Kǝridǝ awowa anyi samma daata wujin.

Daji kǝridǝ Fandikiya baratǝro nguzawono. Kǝriye sambutu sambutu kuru samiro farzǝ sǝkkuru farzǝ sǝkkuru. Fandikiyaye awo laa faton kuttu waazǝnaro asuwono.

Sawosainnaro fatoro kashu, Fandikiyaga zaumaro ajapciwo sa shiye kamunzǝ cin nje lungataa nazǝgǝnan. Shiga kuru ajawaben curo.

Fandikiyaye zǝgali kamunzǝbega lewononya, Njedǝ sadǝn cidiro cukkuro. Kamudǝ zauro nonguwono. Shiye fanzaro faltinro waltinro nyawono.