Zaman laa bultu-alaa dagǝl-alaa mbeji.

Bultudǝ-a dagǝldǝ-a kambigǝgata. Sharabero kambigǝnza fafartaro legada.

Ngawo kawuliwanza fanzǝnaben, sharadǝye ndikatanzan sharadǝga kamtǝro riwono.

Tafakkar cedo, bulturo ayawuga yikkiya, fewanyi zǝgǝrin. Kuru dagǝlro ayawuga cokko yen, ngawulinyi zǝgǝrin! Daji "abi gǝle dikkin?"

Sharaye loktu gana laagaro sǝyingono, daji wono, "Sharadǝ wu runyi kamtǝro zauro kǝrwowu. Hangalwu bǝladeyebero lenowo."

Daji Bultu-a dagǝll-a. Am kurawa hangǝlwubero legada.

Am kurawa hangǝlwudǝro kambigǝdǝ gulgada.

Ngawo am kuradǝye kawuliwanza kǝrǝnzanaben, sandiye cabedǝgai shara kamtǝro riyada.

Dagǝlro gojaaga, bultuye fewanza zǝgǝrin. Kuru bullturo gojaaga, wanee dagǝlye ngawulinza zǝgǝrin. Am kuradǝye bultu-a dagǝl-aro lamarnzadǝ zauro kǝrwowu gada.

Sadǝn, am kuradǝye kǝmurso laa talaa musko dea bǝladǝbe takkada. Afinzǝma fǝrǝshinma ba, wala fema wala ngawulima.

"Shiye ritǝbaaro raksǝ sharadǝga kamjin," am kuradǝye kamanzaro guguljaga. Dabbawa indidǝro nanzǝro lezaro shimogada.

Fato kǝmurso talaadǝbero kashu kuru sandiro shara kamzǝro shiga coworo. Shiye kasatkono.

Amma, gadegadero burwunza falfalro, kǝrǝnjin sǝ sandiro guljiwo.

Burwo salakyen kǝmurso talaaye bultuga bowozǝ, "Nyi darajaa, dabba kura, kuru kǝla-nguwa. Abiyayin nyiga dagǝl gana laa ye tǝskǝnyedǝa gadǝwin sǝ?" gulwono.

Kǝmurso talaaye bulturo, "Kamsoye tawaabando adǝ fangadaga, nyiga ruzain, Dagǝlga luwalatǝdǝ kolle."

"Haiyamaro jirenǝm," wono Bultuye. "Wu manadǝga kolngin. Tawaabadǝye adǝma daryeramnzǝwo."

Daji Kǝmurso talaaye dagǝlga bowozǝ kuru wono, "Nyi faata ye burwoa ye, ngamaro kadawua adǝga kambigǝtǝwin, dabba kainoa liwa kǝmbuma adǝga? Kamsodǝ abi gairo nyiga sorin sa nyiga alagǝ zairogǝnyi adǝga kambigǝtǝwin fanzaiya?"

Dagǝlye loktu gana laaro kǝm sǝdǝnaben, "Jirenǝmde! Mana adǝga kolngin," wono.

Ngawo adǝben, Kǝmurso talaaye sandi indisoga bowono, "Nandi indiso tawaktǝgǝwa mana adǝ koltǝro. Adǝro, nandiye kamando gawurnowo."

Dabbawa indiso gawura mataa na kamanzabe kuru tawa baanzaro sulhu majo.

Sa jama bǝlabe hawardǝ fangadanya, sandiga ajapciwo. Kǝmurso talaadǝye kazǝgidǝro sulhu mazǝgǝna, awo duwo sharadǝ-a am kura-aro sulhu matǝgǝro tiyerǝnadǝ.