Karaa Zǝgiyebedǝn, Dagǝl laa sambisoro karǝgǝ kuttua mbeji. Adǝye afimaro gǝnyi samba yaye tada sambiga tadadǝ waltin nankaro.

Karǝgǝza tadawazǝ bawozainbero Dagǝldǝ samiro farjin sǝdiro ishin. Dalami kǝskabe adǝn farjia dalami kǝskabe tuduro kojin kuru kwi! kwi! kwi! Cirinnaro fafarjin.

Dagǝl sambisoro karǝgǝ kuttua. Karǝgǝ kuttanzǝ tǝrgain sa Dagǝlwa gade dulinzaga suriya.

Dagǝl karǝgǝ kuttuadǝ dalami kǝskaben. Namgata kawu kadaro ciriya cirin.

Waltǝ tada gade sambi. Daji shawargatǝ tadadǝga saadǝ kǝla diwalben gǝnajia, am kotuwusoye shiga soriya barga dǝpcaawaro.

Dagǝlye dalami kǝskaben zǝpsǝ tadadǝga kǝla diwalben gǝnawono. Sa adǝn, barama fatoro waltin. Shiye tada Dagǝlbe bowata shiti laiyen ciro.

Baramaye tada dagǝlbega gozǝ fannzǝro kadio. Sa baramadǝ fatoro nazǝgǝnan, dulinzǝ yakkǝ tada dagǝlbega gotǝro mazain.

Tada yakkǝdǝ kaiya yezainnaro biskezain. "Gǝpkǝne shiga samiro! Gǝpkǝne shiga sǝdiyaro! Gǝpkǝne shiga!" tada dagǝlbe kamannzaro falfalmin gǝpsayin.

Futu duli yakkǝdǝbe tada dagǝlbero biskezaindǝ, ya dagǝldǝbedǝ ngawo kǝskaben gǝrantǝna sandiga lawarjin. Shiye yaazǝna tada adǝmadǝye kuruson amanzǝ gadebedǝgain, nuin sǝ.

Daji Kamu baramabe dulinzǝ dagǝl gana laaro biskezayin isǝ najiwo. Shiye wono, "Hangal gǝnanowo! Kudowo shiga na adǝro. Shiga gǝpnǝwinde!"

Shiye tada dagǝlbe gozǝ nganjiro sapciwo ye barga dǝpciwo ye.

Kamu baramabe tada dagǝlbega gǝnawono. Daji ya dagǝlbeye tadanzǝga gowono. Karaaro sǝgasǝ lewono. Adǝn kǝla fuwunna, dulinzǝ samma kǝnǝngatairo walgada.