Pakarire mukurukadhi oyu gha tungire pithendi. Aye gha karire noshushwa dhodhingi. Mukatji ko dho shushwa ghaa karire po Ngondovoro ghokukurupara oyu gha kwangire kwigha.

Diyuwa dimweya mwikurwendi ghomungaghu ghana mudhingurire ko. Aye gha hafire thikuma pakumumona. Gha tongwera mwikurwendi eshi gha kwate Ngondovoro ghokukurupara gha tereke hadye.

Ngondovoro ghokukurupara gha yiyuvire nomutjima wendi wa kashire. "Aaii, nowe karo wa kurupara ene mbadi na kumona munu oyu ghana kushana kukupagha, nowe yowe kuthimona!" Kutunda po Ngondovovoro ghokukurupara ghomborokire no kutamba kudoropa dhodhikuru gha katange kwimba membo.

Mundhira dhendi gha kuhangana noKathe. "Nye yina hokoka?" Ghepure Kathe. "Mushere hmm, hekudyange ghana shana kunidya po yoyishi mbadi na kukona ku mutongwera ruvedhe, gha ghambe Ngondovoro ghokukurupara. "Ame ne kuna kuyenda kudoropa dhodhikuru ni kembe. Owe ne kupi ghuna kuyenda?" Mushere hekudyange ghana shana kunipagha yoyishi mbadi na kukona karo kukwata muku. Name kuna kutjira, "gha ghambe Kathe. Kukona ni kupakerere noye ndi?" Tu yende!" gha ghambe Ngondovoro.

Ha yendire vene kamaghana no kumona Mbwa ghana kutjira thikuma. Ngondovoro ghokukurupara ghetha no kumwipura mbwa eshi nye ghuna kutjirera kenge. "Mushere, hekudyange ghana ni tJidha yoyishi mbadi na kukona karo kukwata hedhi, gha huthe Mbwa ghuhethangana. Ghukukutu wetu ghuna kupitura. Atwe ne kuna kuyenda kudoropa tu kembe," gha ghambe ngongovoro. Kukona ni kupakerere nenu? Ghepure mbwa.

Yiyama yoyiheya yihatu gha yipawera mundhira yiyende. Mundhira dhawo, Kakambe gha kawa wemeka no kuwepura eshi ngo nye yina hokoka? Hahekudyetu hana shana kutupagha yoyishi mbadi tuna kukona kurughana yirughana yetu,

Wahe hayendire kate dya tokere diyuwa. Ha monine ndhugho apa ha kumeneko ha yuvire kayoghototo mundhugho. Awo ha yapire no ha tokorire hembe dimbo ha tjidhe mo awa ha karire mwishi dhondhugho. Kakambe kemanine, Mbwa gha dhini paghongo waKakambe, Kathe pamughongo waMbwa, Ngondovoro pamughongo waKathe.

Gha hatanga kwimba. "Kwimba kikiriki," ghembe ngondovoro. "myaghu myaghu," ghembe kathe. ghu ghu ghu," ghembe mbwa. "Ririri ririri," ghembe kakambe. Wahe hembire wiyuka pofotji. Hanu awa hakarire mundhugho ne hedhi. Awo hayapire thikuma nokutjira mo.

Ngondovoro ghokukurupara, Mbwa, Kakambe noKathe hengenine mundhugho no hawanine yidya. Apa hamanine kudya gho hararire. Ngondovoro gha rarire pepi nothero, ghamurandire Kathe naMbwa ghokuhurerera ne kakambe.

Mbadi papitire ruvedhe ro rure hedhi ha kahukire. Hekudyawo yo gha tangire kungena mundhugho. Apa ghayandhurire Ngondovoro gha mungomona nomuromo wendi. Kathe gha kamunyanya no mandwara ghako. Paghuhura gha wana mbwa oyu gha muhumine kudighuru.

Mukafumu yu ghareghire no kutwikera. Gha wana kakambe aka ka muthitire kate kufa. Hedhi hamwe mbadi hangenine karo mundhugho. Gha hatjira mbadi ha kahukerire ko karo.

Yiyama yino yaparire thiwana mundhugho dhiya. Ngondovoro gho kukurupara nga tongwera nga ruvedhe hayendhendi, Mbwa nga wa kunganganga. Kathe nga kapaghanga muku dho mundhugho, Kakambe ye nga wereka nga pamughongo hayende kehe kuno hana shana kuyenda.