Luka 11:1-10

Ntsiku inango, Yezu akhaphembera pa mbuto ibodzi. Pidamala iye, nyakupfundza wace m'bodzi ampanga kuti: "Mbuya, tipfundzisenimbo kuphembera, ninga pidacita Juwau Bhatixta apfundzisa anyakupfundza ace."

Na tenepo, Yezu aapanga tenepa: "Mungafuna kuphembera, phemberani tenepa:

Baba: Dzina yanu mbikhale na mbiri. Umambo wanu mbudze kuna ife. Tipaseni cakudya cathu ntsiku na ntsiku. Tilekerereni madawi athu, ninga ifembo
tisalekerera onsene ale anatidawisira. Lekani kutisiya mbatigwa n'kudawa."

Pakumala, Yezu aapanga kuti:

Lang'anani, ngakhala m'bodzi wanu ayenda ku nyumba kwa xamwali wace pa chiti-chiti ya masiku, mbam'phemba kuti:

"Xamwali! Ndibwerekembo mikate mitatu, thangwi ndafikirwa na xamwali wanga m'bodzi, apo ine nkhabe cinthu ca kumpasa."

Mphapo ndiye tani xamwali wace mbantawira n'kati mwa nyumba mbalonga kuti: "Leka kundinyangula! Nsuwo wamala kufungwa pontho ine na ananga tiri kugona. Na tenepo, nkhabe kwanisa kuti ine ndilamuke, toera ndikupase cinthu!"

Ine ndisakupangani kuti, munthu uyu angakhonda kulamuka toera kumpasa nkate thangwi ndi xamwali wace, mbwenye na thangwi ya kun'nyangula kunacita xamwali wace, anati alamuke mbampasa pyonsene pinafuna iye.

Na thangwi ya ipyo, ndisakupangani kuti: Phembani, munapaswa; sakani, munapigumana; pontho gogodzani, munafungulirwa.

Thangwi onsene anaphemba, anapaswa; anasaka, anapigumana; pontho ule anagogodza nsuwo, anafungulirwa.