Ntsiku ibodzi, Nakehi na mkazace adayenda kukazungira xamwali wace Nipapariya na mkazi wace.

Pomwe banja lire lidafika, lidatambiridwa bwino.

Ninga makhalidwe ya cisendzi, mkazi wa Nipapariya adapha nkhuku, aciitereka.

Adadya wentse pabodzi.

M'dzinga unango, Nipapariya adayendambo na mkazace kukazungira xamwali wace Nakehi na mkazi wace.

Pomwe adafika, Nakehi akhali rini pamui.

Akhadayenda kukateya mirapo yace kuti akamange nkhwale.

Pomwe Nakehi adafika pamui, adawona xamwali wace na mkazace. Adakomedwa kwene-kwene.

Ndipo adayenda komwe mkazace akhaphika.

Adakawona mkazace alikuphika cimbamba kuti adzapase alendo.

Nakuti iye akhadateya mulapo pa mazai ya nkhwale, adagwinya cikalango cire, cimbamba cicitayika pantsi.

Adayenda kukaceza na xamwali wace.

Pakucezapo, Nakehi adabva nkhwale kulira. Cikhali cizindikiro cakuti yamangidwa.

Nkhwale yamangidwa na mulapo!

Na cisututu iye adaima, nkhutenga cisu cace, acicipfekedzera m'ciuno. Adathamangira kukhalira nkhwaleko, acikaiwona iri pamulapo ninga momwe akhadakumbukira.

Na kutetemera, adatenga nkhwale ire, aciiphatirira m'manja alibe kuipha.

Na dzanja linango, adaphata mazai.

Adabwerera kumui adakomedwa kwene-kwene.

Thangwe iye akhadabvala thewera, cisu cikhambaceka pang'ono-pang'ono m'ceka ule.

Na kukondwa kwene-kwene, Nakehi adafika pafupi na pamui pace.

Watafika kuseri kwa nyumba yace, m'ceka udathimuka. Thewera lidagwa wanthu alikuwona.

Adayezera kuphatirira thewera, nkhulekerera nkhwale kuthawa.

Mazai nkhusweka pantsi libodzi-libodzi.

Nipapariya na mkazace adaseka kwene-kwene.

Adadzamalizira kudya wentse pabodzi cimbamba comwe akhadataya cire. Bzimwebzi bzin'tipfundzisa kuti bzin'funika kukhala anyakupirira.