Namoome aaba umukhaana ubonekha buulayi naabi. Kuukhuwe aaba uwe shiisa naabi.

Kuukhu we aayila imbuka ndeeyi nga akholela Namoome shitweeya shishibonekha buulayi. Namoome naye waakanatsaka naabi khuukwaara shitweeya isho.

Bakhaana babaandi be khu shisiintsa isho bawaambila Namoome libuba lwe shitweeya sheewe. Bambaasa bari khali shibeele shiilayi khuushimurusakho. Ne shaaba shihangafu khuurusa khu muundu tsingubo tseewe nga waatsikwaarire.

Kumutikhinyi mutweela, bakhana bano balaanga Namoome khuutsya ni nabo basubile atweela mu kheetsi khakhaaba aambi. Nga bali khu luutsi boosi beyabulamo bitweeya byaabwe, nio bilekhe khukhwoonekha ta. Lwanyuma boosi betuumbula mu meetsi, baaba nga behanyakila kameetsi khuumalakho imbuka.

Baamala khuusuba. Umuraangilisi we bakhaana be libuba abo waatuuma shitweeya sha Namoome mu luutsi, aambi ni shiifwo shishabamo kuuremu kuboofu naabi. Baryo bakhaana abo baalekha Namoome nga ali khu ndulo khwe luluutsi alila kamasika.

Kuuremu ukwo, kwaawulila umuundu alila. Kwaanyololokha kwaarura ibulafu, kwaabona umukhaana umumiliwu, Namoome. Kila kumila shitweeya ni Namoome mweene.

Ne she khabi indayi khulw'omukhaana, kuuremu
kwaalekha khuung'aayilwa shitweeya ta. Kila kufuutsa shitweeya atweela ni Namoome. Namoome ni shitweeya baabaawo khu ndulo khwe luluutsi, nga
wetsuulekho kamalusi ke muunda mwe kuuremu. Kamalusi kano nga kawunya buubi naabi.

Khaangukho Namoome wakwaara shitweeya sheewe shishiwunyaalikhana buubi isho, waatimaka ingo isi basaali beewe. Weemba kumweenya ari:

"Maayi, intsikulilewo kumulyaango, indi khuuwunya buubi! Maayi, intsikulilewo kumulyaango, indi khuuwunya buubi! Indi khuuwunya buubi naabi!"

Maayi weewe waawulila kumweenya kwa Namoome, waatima waarura ibulafu we ntsu yaabwe. Weelamo kumweenya ukwo isi umukhaana ari, "Rurawo tsya! Uli khuuwunya buubi! Rurawo tsya! Uli khuuwunya buubi! Rurawo tsya! Uli khuuwunya buubi naabi!"

Namoome waawulila kumutaambo kumukali. Aryo waatimaka waatsya wa seengewe ni khootsawe.
Baamuwulila nga eemba:

"Intsikulilewo kumulyaango! Indi khuuwunya buubi!
Intsikulilewo kumulyaango! Indi khuuwunya buubi!
Indi khuuwunya buubi naabi."

Nabo baatima baarura ibulafu we ntsu yaabwe. Beelamo ni kumweenya isi Namoome bari: "Rurawo tsya. Uli khuuwunya buubi! Rurawo tsya. Uli khuuwunya buubi! Rurawo tsya. Uli khuuwunya buubi naabi!"

Namoome aaramisa khuutsya wa kuukhu yonyene. Ne kumwoyo kweewe kwaba kwetsuule kumutaambo. Weyambaasa ari, mbaawo umuundu namutweela abe unyala khuuloleelela umukhaana uuwunya buubi uyo ta.

Ne kwaluno, sishaba shiryo ta. Kuukhuwe s'aamuwoona ta. Kuukhuwe aabukula kameetsi waasiinga Namoome ni shitweeya sheewe. Waakhola buli shiindu shaaba nga shiwunya buulayi naabi.

Namoome waamenyatsa ni kuukhuwe khuumala kimiiko kimikali naabi. Shifukhu shitweela, umusooleli w'omuyiindifu mutweela waamukana, waamuloomba ari amuyile nga umukhasi.

Basaali ba Namoome baawulila khu bye bukhwaale bino, kila baloomba Namoome bari akobole ingo, amenye mu ntsu yaabwe.

Namoome waashebulila imbuka isi aawunyila buubi naabi. Waashebulila isaambo isi baamubirisamo. Kila ababoolela ari, s'anyala waatsya khuumenya ni nabo luundi ta. Namoome waaloma ari, "Basaali bali
ni khuukana babaana baabwe, abe yakhaba nga bali khuuwunya buubi naabi barye!"

Ne shonyene ndi, Namoome aalaanga kuukhuwe khukhwiitsa khuumenya ni nabo mu ntsu yaabwe, iy'omusooleli w'omuyiindifu.

Shino shasangaasa naabi kuukhuwe, luundi wewulila buulayi naabi. Naluundi shaakila wewulila nga ali umuundu umukhulu naabi!