Luka 15:11-32

Mulopwana mmosa aahikhalana an'awe anli.

Mwaana ookiseriwa aahaaleela atithi awe wiira: "Tiithi, mukivahe epantte ya muhakhu aka munrowanyu okihiyerya."

Siiso, owo aahaakawela muhakhu awe oowanli aya.

Waavinryaya okathi vakhaani, mwaana ookiseriwa aahithukumanya sootheene saarin'awe, onarowa mapuro oottai‐wene.

Weiwo aahihonona muhakhu awe wootheene ni soowiira sawe soololo.

Vaamalinhaawe muhakhu wootheene, elapo eyo yaahivola etala yinci‐ene, nto owo aahipacerya ohaawa.

Tivo, owo aahirowa onvekela muteko mulopwana mmosa a mulaponi memmo, khorummwa orowa okukhula ikuluwe sawe. Owo aaninlela olya yoolya yeeyo ya ikuluwe.

Nto khaavo aanvaha etthu. Owo aahuupuwela, khohimya wiira: "Anamuteko aya atiithi khareerano yoolya, nto miyo, kinkwa etala!"

"Ohoolo waya, aahivinya onarowa w'atithi awe: Anamuteko aya atiithi khareerano yoolya, nto miyo, kinkwa etala!"

Ohoolo waya, aahivinya onarowa w'atithi awe.

Owo nlelo eettaka ottai-wene, atithi awe yaahimoona, nto yaahimoonela othunku, yaahimutthimakela mwan'aya, emukhupaarela envahaka epeeco.

Mwaana owo aahaavekela wiira: "Tiithi, koomutthekela Muluku ni kihootthekelani nyuwo. Miyo nkinreerela‐tho okiirela mwana anyu."

Vano, tiithi awe aahaaruma anamuteko awe: "Iiraka! Muruuhe ikuwo sootepaxa ooreera, munwarihe mwan'aka ola, mwaakuveke! Munwarihe munela ni ixapattho. Mmuruuhe mwanyompe ooneneva, mmuhite. Nrowe nipake niira, notthapela. Okhala wiira mwan'aka ola aahikhwa, nto vano ohihimuwa, aahirimeela nave oophwanyanyeya." Nto yaahipacerya otthapela niira nootthika wa mwan'awe.

Okathi yoowo wa niira, mwan'awe muulupale iira ori‐ene omatta. Ohalaka vakhaani ophiya vate, aahiiwa isipo, ni aahiwoona atthu yiinaka. Owo aahimwiihana namuteko mmosa, khomukoha etthu yaakhumelenle. Owo aahimwaakhula iiraka: "Muhim'anyu t'otthinke, nto atithi anyu, aamwiivela mwanyompe ooneneva, okhala wiira otthinke ori mukumi ni oowoopowa."

Mwaana oopaceriwa aahinanariwa vanci‐ene, khohitthuna ophiya vate. Tiithi awe aahirowa omukhanyereriha yoowo. Nto owo aahiwaakhula atithi awe wiira: "Muupuwele! Iyaakha sootheene kinnivara muteko ntoko epottha, sootheene sinkirumaanyu kinniwiiwelelani."

"Nto nyuwo khamunakivahe epuri emosa wiira miyo kipake niira vamosa n'axipatthani aka. Vano vatthikenlyawe owannyinyu mwan'inyu yoowo ohononne mihakhu sanyu n'anamararuwa, moomwivela mwaanyompe ooneneva!"

Tiithi awe aahimwaakhula wiira: "Mwan'aka, nyuwo munikhala ni miyo okathi woothene, sootheene sirin'aka ti sawinyu. Vano hiyo nihaana otthapela orwa wa muhim'anyu, nave naahaana otthapa okhala wiira owo aahikhwa, vano ohihimuwa, aahirimeela vano oophwanyaneya."