Luka 15:11-32

Kwakalele omulume umwe anko una ovana vevali.

Ngwe omututu waco apopila he yavo ati: "Tate, mpe pehepano ocintimbu cepingo lyange."

Nanyo he pahe, atepulila ouhona wae ovana vae vevali.

Konyima yaco ngwe apahapiti onontiki ononyingi, omona omututu waco aongiya ovipuka aviho anko enavyo, aende kocilongo cokokule.

Ngwe oko ngaako apeselela ouhona wae ouho apelwe, nokukala nokulinga ovipengi.

Eci amana aciho anko enaco, mocilongo oco amuya onjala onene, ongo ahimbika okukonja nesuko.

Ngwe aende kuumwe womocilongo oco, ongo oo emutumu komapya ae okukalisa ovingulu.

Oko, wahandele okulya ovinjengele, okulya kwovingulu ngwe nawike anko umupavyo. Pahe asokolola okuti: "Ocinyingi covalingilili vatate valya okulya avekuta, ngwe ame kuno oco njinkya nonjala!"

"Manjikatuka okwenda kutate ankemupopila okuti: Tate, napengesila Huku noove. Ame hihivilwa vali okutumbulwa ngomona wove, ntekule vala ngaumwe omulingilili wove."

Pahe akatuka okwenda keumbo lyatate yae.

Omona eci anko elikokule he yae wemumonena kokule, emweetela onkenda. Pahe ahateka okelivasa nae, emuumbakana nokumuhipa ombusinyu.

Ngwe omona apopila he ati: "Tate, napengesila Huku noove. Ame hihivilwa vali okutumbulwa ngomona wove."

Ongo he apopila ovaumbili vae ati: "Kanyaukei etei omuvalo ukahi nawa, muvalekei. Muhukikei onela komunwe nononkaku konompai. Etei tupu ondumetane yanina, iipaei tulye ocipito. Ceeci omona wange ou wankile wapinduka; wavombele wavasiwa."

Avahimbika okulinga ocipito.

Omona wae omukulu waco anko ulikepya. Eci akondoka okuhika popepi yeumbo, aivi ociimbo novantu vanyana. Pahe aihana wike povalingilili emupulu eci ciivalela meumbo. Ongo emukumbulula okuti: "Ondenge yove weya, pahe tate yove watuma okumwipaela ondumetane yanina ceeci wakondoka nekongoko."

Pahe omona oo omukulu waco anumana unene, ahahande okunyingila meumbo. Ngwe tate yae alupuka okumukengelela okuti oco anyingile meumbo. Ongo akumbulula tate yae ati: "Tala, tate omanima omanyingi njikulingila napamwe naanyene ocitumino cove."

"Ame napamwe tate wampele ocinkombo njilinge ocipito nomapanga ange! Ngwe omona wove oo, wokwanyinukuta ouhona wove nomakunga, wakondoka wemukamena ondumetane yanina!"

Ongo he ati: "Mona wange, ove apeho una ame, aciho njinaco ocove. Mwaina ontwe anko casukisa okulinga ocipito cokulyata mocanja, ceeci ondenge yove anko wankile wapinduka wavombele wavasiwa."