Luuka 15:11-32

Mulopwana mmoha aakhalano anamwane awe eeli aasilopwana.

Mukhaani aaloca ni apaapa awe, ariki: "Paapa, mukinnye hihano makupa a muhakhu anyu kineeraaka kaakhele mukhwile."

Apaapaaya yaahaakawela muhakhu aya.

Evinre mahiku tonto, mwaana yoole mukhaani aathukumanya muhakhu awe woothene,

avinya ayaaka elapo yoorekamela, weiwe mu olavilavi awe aamaliha muhakhu yoole.

Amalinhe soothene, yaachoowa etala etokotoko mweelapo yeele, nave owo aapacerya othowiwa.

Vaavaa, aavinya anamulapa muchu a mweelaponi mwemmwe, amuruma omaca wawe wi anavaha yoolya ikupa.

Ari weiwe, aanakhwela wiipha etala ni sawiima sawuuma ikupa saalyaaya, nto haavo aamvaha echu. Uupuwenleiye, aahi: "Anamuteko a apaapa
waaca, annalya enavona, nto miyo kinnakhwa etala nno."

"Kinamvinya kaaphwanye apaapa aka, wi kaloceno, kiriki: Paapa, koochekela wirimu ni vamiithoni vanyu. Vano nkiri oophwanela weeriwa mwaninyu. Nto mukeere ntoko mmoha a anamuteko anyu."

Aavinya akookela wa apaapa awe.

Arwaaka hiihaale ociiwene, apaapa awe yaamoona, emoriwano ikharari, emuchimakela, emukhupaarela, emunuula.

Mwaana yoole aaloca, ariki: "Paapa koochekela wirimu ni vamiithoni vanyu; vano nkinaphwanela weeriwa mwaninyu."

Nto apaapa awe, yaaloca ni anamuteko aya, eriki: "Mwaakuve, muruuhe soowara sooreerasha mumwarihe, mumwarihe tho muneela mukathani ni isapatho mwiinaanini. Mmuruuhe mwaasana ooneneva a emope, mmwiiphe, nimukhuure nave nihakalale, ntakhara mwanaka ola aakhwa, vano oovinya; aarimeela, vano ohooneya." Vaavaa, yaapacerya ohakalala.

Nto mwaana mutokweene aari omaca, arwaaka, aacamelaka vaate, aaniiwa wiipa ni wiina. Aamwiichana namuteko mmoha, amukoha echu yeereya owaani. Namuteko aahaakhula, ariki: "Munnaa toruule, nave apaapaa aamwiipha mwaasaana ooneneva a emope, ntakhara ohoorwa ari mukumi."

Nto owo aananariwa, ahikhwelaru ovolowa; apaapa awe yaakhuma emulapelela wi avolowe. Owo aawaakhula apaapa awe, ariki: "Miyaakha mincipale koolapelakaani ntoko kapuro, nkintonko ohiwiiwelelaani, nto nyuwo hamuntokoru okivaha epuri mano, wi kipuhe ni asinthamwene aka."

"Vano oruuleiye mwaninyu ola, olyile muhakhu anyu ni athiyana a anamararuwe, moomwiiphela yoowo mwaasana a emope ooneneva!"

Apaapa awe yaamwaakhula, eriki: "Mwanaka, weyo mahiku oothene ori ni miyo, nave yoothene eri yaaka ti yawaa. Chiri ti waphaama opuha ni ohakalala vamoha, ntakhara munnaa ola, aakhwa vano oovinya, aarimeela, vano ohooneya."