Luka 15:11-32

Mamuna m'bodzi akhali ana ace awiri.

Mwana wa ng'ono apanga baba wace kuti: "Baba, ndipaseni cincino phindi yanga ya unthaka."

Na tenepo, baba wace agawiza pinthu pyace kuna ana ace awiri.

Pa kupita ntsiku zingasi, mwana wa ng'ono, agumanya pyonsene pikhali na iye, mbayenda ku dziko ya kutali.

Kweneko, iye abvunga unthaka onsene ukhadatambira iye, na tsendzo ikhacita iye.

Pidamala iye kubvunga pyonsene, kwaoneka njala ikulu ku dziko eneyo yonsene, iye mbatoma kucherenga.

Na tenepo, iye ayenda kasaka basa kuna mamuna m'bodzi wa dziko eneyo, iye mbamuyendesa ku munda kwace, toera adyese nkhumba.

Kweneko, na njala ikhali na iye, akhafuna kuti adye pyace pire pikhadya nkhumba, mbwenye nkhabe akhampasa cinthu. Anyerezera ekha ene, mbalonga kuti: "Ndi anyabasa angasi a baba wanga, asadya mbakhuta, pontho mbapisiya, ine mbandifa pano na njala!"

"Ndinalamuka, mbandiyenda ku nyumba kwa baba wanga, pontho ndinampanga kuti: Baba, ndadawa kuna Mulungu pontho kuna imwe, pontho ine sidakwana kucemerwa pontho mwana wanu tayu. Nditambireni ninga m'bodzi wa anyabasa anu."

Na tenepo, iye alamuka mbayenda ku nyumba kwa baba wace.

M'phale pikhali iye kutali, baba wace amuona, pontho ciropa cace caguma. Na tenepo, iye an'thamangira mbayenda kaonana na iye, mban'khumbatira pontho mbampsompsona.

Mwana wace ampanga kuti: "Baba, ndadawa kuna Mulungu na kuna imwe, pontho ine sidakwanira kucemerwa pontho mwana wanu tayu."

Mbwenye baba wace apanga anyabasa ace kuti: "Cimbizani! Bweresani nguwo zadidi kakamwe, mum'bvazike, muyikheni mphete ibodzi n'cala mwace, pontho na ntsapato m'myendo mwace. Bweresanimbo mwana ng'ombe wakunenepa, mumuphe. Tendeni tidye pontho titsandzaye. Thangwi mwana wanga uyu akhadafa, lero alamuka. Akhadataika, lero agumanika!" Na tenepo, onsene atoma kucita phwandu.

Mwana wankulu akhali ku munda. Mukhabwerera iye, pidafika iye dhuzi na pa nyumba, abva kuimba pontho na kubvina kwa anthu. Na tenepo, acemera nyabasa wace m'bodzi mbambvundza tenepa: Ndi ninji pinacitika? Mphapo iye alonga kuti: "M'bale wako abwerera ku nyumba wa m'maso pontho na ungumi wadidi, na thangwi eneyo, baba wako aphesa mwana ng'ombe wakunenepa."

Mwana wankulu aipirwa pikulu kakamwe, mbakhonda na kupita kwene n'nyumba. Na tenepo, Baba wace, abuluka kunja mbankakamiza kuti apite. Mbwenye iye apanga baba wace tenepa: "Ine ndisakuphatirani basa pyaka pyonsene ipi, pontho nkhabe ntsiku ibodzi idapwaza ine mwambo wanu."

"Na tenepo, imwe cipo mudzati kundipasa na mbuzi ene ibodzi toera ine ndicitembo phwandu na axamwali anga! Mbwenye pidabwerera mwana wanu uyu, adabvunga pinthu pyanu na akazi a n'jira, imwe mwam'phera mwana ng'ombe wakunenepa."

Baba wace ampanga kuti: "Mwana wanga! Iwe uli na ine ntsiku zonsene, pontho pyanga pyonsene, mphyako. Mbwenye ife tikhafunika kuti ticite phwandu titsandzaye, thangwi m'bale wako akhadafa, lero alamuka; iye akhadataika, lero agumanika."