Luuka 8:5-15

Yeesu aahi:

Mulopwana mmoha aamisa mmiso awe.

Amisaka, mmoha waamorela vakhiviru wa mphiro, onyikaliwa ipalame irwa ethupavo.

Mmiso mukina waamorela vamalukuni, nsuwa naavihalaaya waahuuma ntakhara hiwaanaanavo.

Mmiso mukina waamorenle vamiiwani, winnuwaka waaninnuwa vamoha ni miiwa inyoka.

Mmiso mukina waamorenle echaya yaphaama, winnuwa wiimiha sawiima sincipale.

Aalonceiye yeela, Yeesu aakhuwela: "Ori ni maaru, iiwe!"

Oohuserya awe yaamukoha eriki: "Tisheeni nnataphulelaaya niphwanaphwaniho nla?"

Yeesu aahi: "Wa nyuwo, moovahiwa osuwela soovitheya sa omwene wa Muluku."

"Echu nnataphulelaaya niphwanaphwaniho nla tiila: Mmiso, ti masu a Muluku."

"Yoowo waamorenle mukhice wa ephiro, ti achu yaawo aniiwa masu, onnarwa Musaserya aviihamo masu, yaawo yaaliwe mwa yaawo wi ehiroromele wi evulushiwe."

"Mmiso waamorenle vamalukuni, ti achu yaawo aniiwa masu yaakhela ni ohakalala. Vawi hanakhalano mitataari elukuluku yavakhaani annaroromela, yaphiya yaweeha annahiya."

"Waamorenle vamiiwani, ti achu yaawo aniiwa, nto va nthowa na muhakhu ni soochunachuna sa mwiili, annahuruweleya enyokeya ehiwerya wiimiha sawiima."

"Mmiso waamorenle echaya yaphaama, ti achu yaawo aniiwa masu ni murima waphaama enakhapelela ophiyerya yiimale sawiima saphaama."