Luka 12:15-23, 30-31

Jezu adati: "Khalani na cheru! Khalani wakudziwa letu kuti muleke kukhala na m'tima loko-loko wakufuna bzizinji, nakuti moyo wa munthu ulibe basa na kuwanda kwa bzinthu bzace."

Na tenepo Iye adawauza mfananizo wakuti:

M'munda mwa munthu winango wakudala mudacoka bzakudya bzizinji.

Ndipo iye adakumbuka mumtima mwace kuti: "Kodi nin'dzacita ciyani? Ndiribe kwakuikha phoso langu."

Ndipo iye adati: "Ndadziwa tsapano bzomwe nditi ndicite. Nin'dzapfudza magwangwa yangu ndipo ndicimanga yanango makulu, ndicidzakoya m'mwemo phosolo na bzinthu bzangu bzinango."

"Ndipo ndin'dzalewa ndekha kuti: 'Iwepo una bzinthu bzizinji, bzidakoyedwa kwa magole mazinji. Puma, dyaya, mwaya ndipo kondwa.'"

Mulungu adamuuza kuti: "Nandi wakusaya ndzeruwe! Usiku buno-letu moyo wako unimala. Tsono mbani an'sala na bzinthu bzomwe udakoyabzi?"

Tenepayu ndibzo bzimbacitika kuna ule omwe ambabzikoyera cuma, tsono kuna Mulungu ni wakudala lini umweyo.

Patsogolo pace Jezu adauza ateweri wace kuti: "Ndipopo Ine ndirikukuuzani kuti: Lekani kukhala na thupo na moyo wanu,

kuti mun'dzadya ciyani napo kukhala na thupo na thupi lanu kuti mun'dzabvala ciyani."

"Nakuti dziko la wakusaya kupemba ndiro limbathamangira m'mbuyo mwa bzinthu bzimwebzi. Tsono Baba an'dziwa kuti imwepo mumbabzifuna. Tsono, nyang'anani umambo bwa Mulungu, ndipo bzinthu bzimwebzi bzin'dzathimiziridwa kuna imwe."