Bureiki ya Tshikolo tsha Phuraimari tsha Themapfunzo i tsini na u bva. Vhaṋe vha zwiphaza zwivhili afha tshikoloni vha khou ḓilugisela u rengisela zwiḽiwa vhagudi. Nḓala i khou kora!

Tshiphazani tsha Vho Gogoro vhurotho ha u ita kota ho no dzula ho tshewa. Vha kora kota ya vhurotho nga ngomu. Vha dzhenisa paḽoni na matshipisi afho ho koriwaho. Kha kota iṅwe na iṅwe, Vho Gogoro vha kapulela lebula mbili dzo ḓalaho dza atsha yo itwaho nga mufumakadzi wavho. Vha tshi ḓikhoḓa vha ri kota dzavho ndi miṱumba, dzi na atsha nga ngomu na nga nṱha!

Ngei tshiphadzani tsha Vho Singo matshipisi a tsini na u luga, fhedzi vha kha ḓi fhedzisa u tshea kota dza vhurotho. A vho ngo takala ngauri zwithu a zwi khou tou tshimbila zwavhuḓi afha tshiphazani. "Ndo thoma zwavhuḓi," ndi Vho Singo vha tshi elekanya. "Fhedzi ano maḓuvha khasiṱama dzanga a si nnzhi. Tshine nda khou lingedza u ita ndi u tshea kota ṱhanu kha ḽofo iṅwe na iṅwe ya vhurotho u itela u vhuelwa."

Lusani na Masindi vha khou renga tshiswiṱulo. Masindi u renga ha Vho Singo. Lusani ene u renga ha Vho Gogoro. U na lutendo lwa uri Kota dza Vho Gogoro dzi na matshipisi manzhi na atsha nnzhi u fhira dza Vho Singo.

Muduba wa tshiphazani tsha Vho Gogoro u dzula u mulapfulapfu. Ndi ngazwo Masindi o vha o lindela Lusani. Zwino vhathada vho no dzula vhoṱhe murunzini vha tshi khou ḓikanda nga kota dzavho.

Hu na zwine Masindi a khou vhona zwi no mu ita uri a zwondolole e na mbudziso. "Ni khou zwondolola mini? hu vhudzisa Lusani. "Kota yaṋu! I vhonala i khulwane kha yanga," hu amba Masindi.

Vha mbo pima kota dzavho nga maṱo. Ndi ngoho, kota ya Lusani ndi khulwane. "Hu na zwo khakheaho hafha fhethu," Masindi u ralo. "Ṱhamusi ndi ngazwo tshiphazani tsha Vho Singo hu si tsha ḓala." Lusani a thoma u elekanya a kona uri "Hu pfi vhaṅwe vhana vho vhona Vho Singo vha tshi khou tshea ḽofo nthihi ya vhurotho ya bva kota ṱhanu!"

Zwine zwa khou ambiwa nga Lusani na Masindi zwa mbo pfiwa nga Tshedza a tama u ḓivhesa. A vha vhudzisa uri ho khakhea mini musi ḽofo ya vhurotho i tshi tshewa ya bva kota ṱhanu. Masindi na Lusani vha fhindula khathihi. "Kota ndi kota ya ḽofo!" Tshedza u vhonala a tshee o ḓaḓa, zwa kombetshedza Masindi u ṱalutshedza. "Ḽofo i tea u tshewa ya bva zwipiḓa zwiṋa zwi no eḓana. Zwa sa ralo, zwe zwa tshewa a si kota."

Tshedza o sinyuwa vhukuma ngauri na ene u renga ha Vho Singo. "Izwo vha khou ri tswela vhurotho!" u ralo a tshi ambela nṱha. Masindi a mbo humela tshiphazani tsha Vho Singo uri a sumbedze u sa fushea. U ṱuwa o tou hwalela thovhela, iḽa kota yawe yo tengenedzwa tshanḓani! A no khou hwenya-vho nga murahu ndi Tshedza. Lusani a mbo takutshedza-vho a tevhela khonani dzawe.

Vho Singo a vho ngo takala musi vha tshi vhona uri avha vhana a si vharengi vhaswa. "Yoo, no dovha na vhuya? vha a vhudzisa, "ndi ni thusa nga mini-ha wee?"

"Vho Singo, ndo ḓa nda ri vha mmphe kota na tshelede ye nda bvisa i lingana kota. Fhedzi hezwi a si kota," ndi Masindi a no ralo, o sumba kota yawe. "Ndi fhiwa kota kana ndi fhiwa tshelede yanga murahu," u tou ombedzela thovhela.

"Ndi zwa vhukuma Vho Singo? Vho vha vha tshi khou ri fhura vhone!" ndi Tshedza a tshi huwelela. Hu na lugwada lwa vhana lwe lwa tevhela avha vhararu afha tshiphazani lune lwa khou thetshelesa u pomokwa uhu. Vho Singo vha hanedza nga zwanḓa. "Naa ni nnyamba hani naa?" vha a dadadza. "A thi shumi ngauralo nṋe, nii! Ibvani ni fhele vhengeleni ḽanga! Zwino!"

Ha mbo fhindula Masindi o tokomelwa, "Hezwi zwine vhone vha khou ita ri ḓo zwi vhudza-vho vhaṅwe. Phungo yazwo i ḓo gidima na tshikolo tshoṱhe hetshi. Hetshi tshiphaza tshi ḓo fhedza tsho valwa. A hu na murengi na muthihi a no ḓo dovha a renga fhano!" Vho Singo vha sedza avha vhana vhararu vha re phanḓa havho. Vha dovha vhe maṱo hashaa kha gogo ḽi re ngei nnḓa ha tshiphaza.

"Ho luga-ha, ndi ḓo ni humisela tshelede yaṋu." "Vha dovhe vha ri fulufhedzise uri vha ḓo tshea ḽofo ya bva kota dza u ita kota, ndi Lusani a tshi bva mulomo. Vho Singo vha mbo fulufhedzisa uri zwi ḓo tou ralo. Vha mbo kokomola ipfi uri vha pfiwe na nga vha re kule, "Ndi khou ni fulufhedzisa uri ndi ḓo phaphela atsha nnzhi na matshipisi manzhi kha kota dzanga."

Ingoho, Vho Singo vho mbo engedza matshipisi na atsha kha kota dzavho. Hu si kale vhana vha tou phaphulana vha tshi ḓa u renga, tshiphaza tsha vuwa. Vho fhedza vho hira na muthu wa u vha thusa.

Ṋamusi ho no vha na u ṱaṱisana hu si na nndwa ngomu vhukati ha Vho Singo na Vho Gogoro. Ndi ḽa maladze.