Nako ya go ja e kgauswi mo sekolong sa Poraemari sa Diphuthi. Boramabenkele ba babedi ba mo sekolong ba lokiša letena go yo rekišetša bana bao ba swerwego ke tlala.

Ka lebenkeng la Morena Motaung, go ripeletšwe borotho bjoo bo emetšego go dira dikota. O ripa bokagare bja kota ya borotho ye nngwe le ye nngwe ka tlhokomelo. O tšhela palone le ditšhipisi mo sekgobeng sa ka gare. Motaung o tšhela malepola a mabedi a go tlala a atšha yeo e dirilwego ke mosadi wa gagwe ka gae go kota ye nngwe le ye nngwe. O rata go kgantšhetšha batho gore dikota tša gagwe di na le atšha ka gare le atšha ka godimo!

Ka lebenkeleng la Morena Malepe, go bonala ditšhipisi tšeo di lego kgauswi le go butšwa efela o sa tšwela pele go ripelela borotho bja dikota. Morena Malepe o na le pelaelo ka lebaka la gore dilo ga di sepele gabotse ka lebenkeleng. "Dilo di be di sepela gabotse mathomong," Morena Malepe a nagana bjalo. "Bjale bareki ga ba sa bonagala gabotse. Ke leka go fokotša tše dingwe tša ditefelo ka go ripa dikota tše hlano go borotho bjo tee."

Jabu le Zodwa ba reka dijo tša mosegare. Zodwa o reka ka lebenkeleng la Morena Malepe. Jabu yena o reka ka ga Morena Motaung. O dumela gore kota ya Motaung e na le ditšhipisi tše ntši le atšha go feta kota ya Malepe.

Mothaladi o phela e le wo motelele lebenkeleng la Morena Motaung. Zodwa o emela Jabu. Bagwera ba dutše mmogo ka tlase ga morithi ba ipshina ka dikota tša bona.

Go na le seo Zodwa a se lemogago, seo se dirago gore a lebelele ka tlabego. "Na o lebeletše eng?" Go botšiša Jabu. "Kota ya gago! E lebelelega e le ye kgolo go feta ya ka," Zodwa a realo.

Bobedi ba lebelela dikota tša bona ka bokgauswi. Ka nnete yeo e tletšego, kota ya Jabu ke ye kgolo."Go na le phošo mo," Zodwa a realo. "Ke ipotšiša gore na le e kaba e le lebaka leo le dirago gore lebenkele la Morena Malepe le se ke la ba le bareki ba bantši." Jabu a nagana sebakanyana morago ga fao a araba, "Ke kwele gore bana ba bangwe ba bone Malepe a ripa dikota tše hlano go borotho bjo tee!"

Nomsa o utswa ka tsebe seo se bolelwago ke Jabu le Zodwa gomme o kganyoga go tseba. O ba botšiša ge eba go na le phošo go ripa borotho ka diripana tše hlano tša go dira dikota. Zodwa le Jabu ba fetola ka nako e tee, "Kota ke kotara ya borotho!" Nomsa yena o sa bonagala a gakanegile, gomme Zodwa o a hlaloša, "Borotho bo swanetše go ripša ka diripana tše nne tša go lekana. Go sego bjalo, ga se dikota."

Nomsa o kgopišegile ka lebaka la go re le yena o reka ga Morena Malepe. "Bjale, o utswa borotho mo go rena!" A realo a hlaboša lentšu. Zodwa o akanya go boela morago go Malepe go iša pelaelo. O matšha a swaretše kota godimo. Nomsa o mo šetše morago ka go phakiša. Jabu o a fegelwa gomme o a emelela go latela bagwera ba gagwe.

Morena Malepe o nyamišitšwe ke go bona gore bana bao ga se bareki ba baswa. "Oh, dumelang gape bana," a realo. "Nka le thuša?"

"Morena Malepe, ke le kgopetše kota ka ba ka e lefela. Efela se ga se kota," Zodwa a bolela bjalo a bile a šupa kota ya gagwe ka monwana. "Ke nyaka kota goba tšhelete ya ka e boe morago," a tlaleletša ka go kgwahliša ka ganong.

"Na se ke nnete Morena Malepe? O be o re jabetša!" Nomsa a ntšha sello sa gagwe. Bana ba mmalwa ba ba šetše morago go ya lebenkeleng, gabjale ba theeleditše ditatofatšo tšeo tše bogale. Malepe o bolela a hwidinya diatla ka bogale. "Na le reng ka nna?" o dira boipelaetšo. "Ga ke bjalo nna! Etšwang ka mo lebenkeleng la ka gonabjale!"

Zodwa a bolelela fase a re, "Re tla botša batho ka moka seo o se dirago. Ditaba tše di tla gašwa le sekolo se ka moka. O tla swanelwa ke go tswalela lebenkele le la gago. Ga go na yoo a ka tlago a reka mo go wena!" Morena Malepe a lebelela bana ba bararo bao ba emego pele ga gagwe. Morago ga moo a bona sehlopha sa batho seo se golelago godimo ka ntle ga lebenkele la gagwe.

"Go lokile, "a tiišeletša ka go re, "Ke tla le fa tšhelete ya lena morago." "Gape o tshepiše le go re o tla ripa borotho ka dikotara tša maleba tša dikota tša gago," go bolela Jabu. Morena Malepe o tshepiša go dira bjale ka ge a laelwa. Morena Malepe a gohlola go bula megolo gomme a hlaboša lentšu gore yo mongwe le yo mongwe a kwe seo a se bolelago. "Ke tshepiša gape go re ke tla oketša atšha ye ntši le ditšhipisi tše ntši.

Ka nnete Morena Malepe o ile a oketša ditšhipisi le atšha dikoteng tša gagwe. Go se go ye kae ke ge bana ba bantši ba reka go yena gomme lebenkele la gagwe la thoma go šoma gabotse.

Gabjale go rena phadišano ye botse magareng ga Morena Malepe le Morena Motaung, gomme yo mongwe le yo mongwe o thabile.