Diyuwa dimweya, Ngandu gha karire pepi no Diviya ghuyota kashe. Shokoghana gheyire kumeyu no hakumorore.

Shoko ghepura Ngandu eshi kupi watunga? Ngandu hamu hutha eshi, "ame kwatunga muDiviya". Shoko gha tetukire. Shoko ghepura Ngandu eshi, "ngepi ghuparo muMeyu? Ghuwa ndi?"

Ngandu ghahuthire eshi, "ghuparo gho muMeyu ne ghuwa. Owene kupi watunga?" "Ame kwatunga kuyitondo no kudya mbuyo no mahako. Owene yinye wadyanga?"

Ngandu gha hutha eshi, "ame kudya nyama." Ghu ghayara eshi ngepi shogha kone kukwata Shoko ghamudye. Ngandu ghepura Shoko eshi, "nowe kukona kuyogha ndi?"

Shoko ghahutha eshi, "Vame, kadi wakuyogha." "Ninge nikuhonge kuyogha," gha ghambe Ngandu. Shoko ghahutha eshi "vako, mbadi nayihafera."

Ngandu ghangera Shoko eshi, "tuna kara keho twaka ghushere, waniyapa, wiye no hungumane pamughongo wange." Shoko gha hungumana pamughongo waNgandu no Ngandu ghatangire kuyogha.

Apa haka kumine pakatji koDiviya, Ngandu hepura Shoko eshi "ngepi edi ghuna kukuyuva pakukara muDiviya? Kuna kukuyuva thiwana ndi?" Shoko ghahutha eshi, "ame ne kuna kukuyuva thiwana karo nayihafera shemwa."

Ngandu gha hethera no kughamba kwaShoko eshi, "Nyanu ne tjitju thikuma. Mbadi tuna wana ghuwanga gho kumupangitha."

Shoko gha ghatukukire. Ghu kughayara eshi ngepi edi shaghombe Ngandu.

Shoko gha karire no dighano. "Wakudhekera, nakutapa mutjima wange kwa Mwedyoye, mutjima ghoShoko ghuna kamwirura," gha ghambe Shoko kwaNgandu.

Ngandu yamutetukithire. Gha ghambire eshi, yoshemwa vene ghuna shana kutapa mutjima ghoye kwaNyanu ndi? kemo atwe ne twaka ghushere, ghahuthe Shoko.

Kapupi kamanana, Shoko kokughamba eshi, "ghaghuwe hewa nithighererepo navurama mutjima wange kuthitondo. Tuhuke nika ghushimbe."

Ngandu gha tamangera no kwipura eshi, "ghushemwa ndi, ghuna kashimba vene mutjima ghoye kuthitondo ndi? ghi...nakughureta nokuyenda noye tuka mudhingure Mwedyoye," gha huthe Shoko.

Ngandu gha tawa no kupiruka ghayoghe ghutamba kumbombwa dhoDiviya. Apa hakakumine kumbombwa dhoDiviya, Shoko ghareyi pamughongo waNgandu.

Pa kukuma Shoko kumute ghothitondo, kokughamba eshi, "natumera kumudhingu ghomuDiviya. Thiyarepo mushere wange."

Ngandu gha tokotire. Ko kufudha kwendi, "napo ghu na nangera, ghuna kaghureta mutjima ghoyendi?" Shoko ghahutha kwendi eshi, "nakono kuhungumana pamughongo ghoye yoyishi nomutjima wange nakara." Ngandu gha hukire nokawana Mwedyendi ghan fu.