Mundalo tsia khale, yaliwo omusatsa wali nende buli eshindu mu bunji – omukunda omunji kwe imbolela, nende tsing'ombe, amakondi nende tsimbusi. Ne, olwa yatsililila okhukofula, yaulilanga obubi, okhubela yali nabula eshindu shilala. Shiyali nomukhasi tawe.

Niyemele asi wo musala olundi, liparo liamakana liamwitsamo. Shiyali nanyala okhunyoola omukhasi tawe. Aundi yekasirie owuwe?

Yanza okhubatsa omukhasi eshiombo, okhurula khwisaka liomusala. Olwa yali namalile okhubatsa eshifwanani, yaabasia khumoni tsiomukhasi oyo, ne nitsilimbukha. Yamufura furakho omuya kaala, ne obulamu nibumwitsamo.

Nabwene, yali omukhasi eshiombo okhushilakho yesi yesi owayali niyalolakho. Yasikama imbeli we ne namusaya okhuba omukhasiwe.

Yamwelesia eshibunguyi shie ifwani indayi po, efiuma, nende olusimbi lwomurwe, eshimanyiro shiomukhasi wateekha. Ne namumbashila inzu ya matoyi nende obunyasi obwali nibwamela asi weshisina shiomusala oko. "Ekhusaya eshindu shilala shionyone," nabolera omukhasi we oyo. "Olabolelangakho omundu yesi yesi worulanga tawe."

Ne mufise fititi busa, abasiani okhurula mulukongo lwa ambi awo, banza okhupa imbakha ye. "Omundu omukofu nga uno anyala arie okhuba nende omukhasi eshiombo khandi omukhaana nga uno?" Bebondela omukhasi oyo nibamwiba, nibamuyira mungo wabu.

Omukofu oyo nafwa omwoyo muno. Yalola mbu shanyala okhumenya nalali nomukhasi we oyo tawe. Khandi napara, "Aundi nindakhanyolakho eshindu shie busa, shindakhaba neshibela endi tawe?" Yaruma namburuku ke okhutsia okhumukhaaba, mana kamwimbile, ne kakalushe neshindu okhurula khu ye.

Ngala kamunyoola, kamwimbila mulusungo lwa mayoni: "Omukhasi musala, omukhasi musala, eshiombo shishirakho oundi yesi yesi, omusatsa wo akhurumire okhwenda eshibunguyi shio!"

Omukhasi oyo nakayeresia eshibunguyi shie, ne nikapurukha, ekulu we shikulu, ekulu wo mwalo, nikakalukha wo musatsa we. Omusatsa oyo nabukula eshibunguyi esho niyefunikha mubweni bwe, niyeulilakho obulayi atiti.

Ne amaparo ke shikaakamila abwenao tawe. Kho khandi naruma namburuku ke okhutsia okhwimbila omukhasi we khandi: "Omukhasi musala, omukhasi musala, eshiombo okhushila oundi yesi yesi, Omusatsawo akhurumile okhwenda olusimbi lulwo lwokhumurwe khumukalusirie! Bwangu nikapurukha nikakalukhayo nende olusimbi lwokhumurwe olo, eshimanyiro shio mukhasi wateekha."

Omusatsa oyo yafumbara olusimbi olo ne niyesia amaumo kokhwitsulila omukhasi we, owali ale mulukaka lwa bandu bandi busa. Inyuma we fise fititi, khandi nalanga namburuku ke.   Tsie khuye khandi mumwimbile, "Omukhasi musala, omukhasi musala, Eshiombo okhushila oundi yesi yesi, Omusatsa wo akhurumire okhwenda obulamu bwo!"

Kho olwa khataru nikatsia khandi. Nikayeera khumabeka keke. Shinga katsiririra okhwimba, buli namburuku liakhulula imoni mushianganga shie. Bwangu obo omukhasi oyo niyekhola khandi eshifwanani. Efilenje fie nende amakhono nifilakakha. Olunyuma omurwe kwe kwosi khandi. Ne nalakakha asi.

Omusatsa we, kaala nasindikisia okurundu kwo musala mukhasi oyo nakuyila khumwalo. Nakwemia mu matsi nemisi chakwo. Kwekhola omusala khandi, olwa kwanyoola imbolela ye liloba lilayi, nende obutundumu bwe liuba nikusebukha amasafu khandi.

Ne omuyeka nikuutsa, amasafu ako kesinjia amaumo. Shinga omukhasi yekholanga niyenya omusatsa we.