Hale hale yaliyo omusinde owaali ni hiisi hiitu mu bungi. Gaali n'enimiro omwali hiisi biryo, ko n'ebidooli by'eŋombe, etaama n'embusi. Aye ni gatiina n'asahuluŋa gasuna ohunakuŋala olwohuba ti ŋaaliŋo ehi gaali n'abula. Gaali abula muhasi.

Lulala ni gaali ni gemereye mu musaala, gafuna ehiŋeego ehyene ehiraŋi. N'aba n'ataŋanga hufuna muhasi, aŋanga ohwebajirayo owuwe?

Ng'aŋo atagiha ohubaaja omuhasi omwene omuŋoono mu lusaga lw'omusaala omugumu. Ni gahena ohubaaja ehibaaje hihye, gahiŋamba hu moni nga jilimbula. Gahifuŋirero omuya polapola nga hifuuha hiramu.

Mu butuufu ono nj'owaali omuhasi asinga obuŋoono hu bagaali ni gahabona. Gahubba amafuha gamulomba abe muhasi wuwe.

Gamuŋa ehimolo ehya mabalabala, embira ko n'omuge ohulaga ti ŋahani muhasi mufumbo. Ng'ahena amutongolera enyumba eyi gamaala n'eroba era gayisimba n'enyaasi eryali ŋaasi w'omusaala ogu gatemaho olusaga. Omusinde ono ng'aloma omuhasi wuwe ati, "Kulomba ehiitu hirala soolomerangaho omuutu yeesiyeesi eyi nahutusa."

Eteŋama siryabitaŋo eleeŋi, abosuho bomu bitehere ehiririhene nga batagiha ohwebuusagania baati, "Omusinde omusahulu ono aŋanga atye ohuba n'omuhasi omuŋere ate nga muŋoono atyo?" Ehi bahola basalaŋo humwiba bamuŋire ewaawe.

Omusahulu ono ganakuŋala, olwohuba ti gaali saŋanga humenya n'abula muhasi wuwe. Aye ng'aŋeega ati, "Hamunga mba ni ndiho n'ehiitu hihye hyosihyosi sinahanakuŋaye ti." Ehi gahola gatuma amaŋuusi gaje gamwendule, gamwembereho era gamutuseho ehiitu hyosihyosi gamuleetere.

Ni gamwagene gamwembera mu lulimi lw'enyuni. Muhasi womu musaala, muhasi womu musaala Ahira boosi obuŋoono Wamwo atutumire Hwagamye ehimolo hihyo!

Nga agaŋa ehimolo hihye gagululuha gatuuma esosi n'enjabi nga gahiŋirira wamwe Omusahulu gewiha ehimolo mu moni, gaba musangafu ohuhena ahateŋama.

Aye ohwenda ohu gendiremo omuhasi wuwe sihwahendeera. Nga nindi atuma amaŋuusi gaje gamwembere: "Muhasi womu musaala, muhasi womu musaala Ahira boosi obuŋoono Wamwo atutumire hwagamye omuge gugwo Nga gaguluha gagamayo n'omuge ogwali ahabonero h'obufumbo."

Gaŋamba omuge nga geesa omuya aloma ati, muhasi wange ali aŋale mu lusito lw'abaatu abandi. Ahateŋama ni habitaŋo galanga amaŋuusi gagatuma nindi gaje gembere omuhasi nago. Muhasi womu musaala, muhasi womu musaala Ahira boosi obuŋoono Wamwo atutumire Hwagamye obulamu wuwo.

Ng'aŋo gatiina efunda eyohudatu. Ni goola gagwa hu mabega g'omuhasi nga hiisi ŋuusi libojamo emoni. Naŋa weene aŋo omuhasi gafuha hibaaje. Amagulu gage emihono n'omutwe byajagaliha. Nga agwa ŋaasi.

Wamwe nga aŋiringisya enduli eyaali ehibaaje hy'omuhasi wuwe ahiŋira hu lwabi. Ni gasyosa gahyemeresa emirandira ni jiri mu maaji. Obugimu w'eroba n'obubalire w'eryuba byahiretera ohuloha nindi.

Era embeŋo n'ehubba hu mahoola g'omusaala guno galoma ng'olu muhasi owenda wamwe aloma.