Khaalekho, yaba mbaawo shishiilima mu shaalo sha Opio ta. Babaandu abe batsya khukona nga baaboone baaluwile, namwe baraamba nga bali meeso.

Shifukhu shitweela, Opio waatsya khuyiima ni tsiimbwa tseewe. Lubaluba tsiimbwa tsafumbusa ikhisi tsakitimisa. Opio naye waatsoongakho. Waatima khuumala imbuka ndeeyi. Buli isi aawulila nga waaluwile, ekhala aasi wawolakho, ndi nio wenyukhilisa luundi. Ne s'aatuya tsiimbwa tseewe ta.

Lwanyuma lwe khuubirawo bifukhu biikali, Opio wenyoola nga ali mu shaalo shiindi busa. Wakyeenda waatsya khu ntsu iyaba ili aambi, waaloma mweenewo ari, "Naatimisile ikhisi khuumala imbuka ndeeyi. Indyo naaluwile naabi, ingana khuuwolakho."

Umuseetsayo waamulomela ari, "Yikhala uwolekho. Unakana unywekho indali?" Opio yaba buulesa bwaamuminyile, kila anywakho indali. Lwanyuma waatsya waakona. Nga n'aasisimukha mwiilo, Opio s'aanyala khuubona ta. Wikula tsimoni, n'afunyikhilila tsifuunda ngali, ne nga s'abona buulayi ta. Kila alomela umuweele indali ari, "Iwe umbeele shakhunywa shiibi. Sinyala khuubona buulayi nga amataayi ta."

Kila umweenewo naye amwiilamo ari, "Mbaawo shiibi shoosi ta. Ari shiilo/shishiilima. Iwe mbakhubonatsakho shishiilima ta? Nga buwaanga bwaatsiile, shishiilima shiililisa." Opio waareeba bireebo bikali bibiwaamba khu shiilima. Waananikha khuushikana naabi. Niye n'umusaalewe baakanikha bwasheelakho. Opio waakonayo luundi nga akana abonekho shishiilima nga shikobola luundi.

Kumutikhinyi kukweelakho, wareeba musaalewe ari, "Ingola ndye nio inyalise khuukhweesa shishiilima naashiyila mu shaalo she weefwe? Ingana babaandu baase babonekho shishiilima."

Musaalewe weelamo ari, "Nga waaboone antsye abukabukana, rakikha lukeendo ukoboleyo ingo mu shaalo shoowo. Nga walolelele iburaangisi yonyene, kane shishiilima shikhuloondekho. Ukhakhakakho wishebukha ta. Nga wishebukhile, kane shishiilima shikorewo." Opio naye waakhola nga musaalewe n'aamulomela. Ashilo, waarakikha lukyeendo khuukhobolayo mu shaalo sheewe. Wiwulila ari shishiilima shaamuloondelekho. Waakana eshebukhe, ne wenyindaalila.

Nga noola khu shaalo she waabwe, babaandu baarya naabi. Baamureeba bari, "Opio, lufu shiina lweesi ukhureerere luno? Kuundu shiina kuumali kukukhulondelekho oku?"

Opio waabeelamo ari, "Basaale baase, kukuundu kuumali kuno bakulaanga bari shishiilima. Kuli khuubariisariisa inywe nga nase ni kwandiisa khunyoowa." Opio walooselakho ari, "Ne kane mukyelewo mukane shishiilima. Buwaanga nga buliwo, khunyala khuuraamba, ne nga shishiilima sheetsile, khunyala khwakona khwaawolakho."

Iyo niyo isaambo isi shishiilima sheetsila mu shaalo sha Opio.