Khaalekho, aabawo umusaani mutweela isi balaanga bari Kusolo. Niye aaleekelatsaka babaana khuusoma, nga s'araambisa shishoombekhe she lileekelo ta, ne baabatsaka mwisina mwe kusaala kwe tsimuka.

Lutweela angoloobe, khaasolo is balaanga bari Paa khaaniina khu kusaala tsana, khukhwiiba kamatuunda kaakhwo. Khaasolo khano khatengaasa kuusaala, kuumuka kutweela kwahanukha, kwakhupa Kusolo khu murwe kwaamwiira. Ne babaana ni beetsa baanyoola nga umuleekeli waabwe waakwiile aasi waafwiile, betsula kumutaambo kumukali naabi. Baryo kila bakana bamanye naanu uwirire umuleekeli waabwe Kusolo.

Kila bawaamba Imbweo iya Simwaalo (Sausi windi). Baaloma bari, "Iwe niye uwabirire waakwiiisa aasi kuumuka kukwaakwiile kwakhupa umuleekeli weefwe Kusolo? Khali siwashikholile uryo ta." Ne Imbewo iya Simwaalo yaaloma iri, "Ise imba uwe kamaani, khali liitikiiyi lye liiloba buloba liikhaliilisa ise?"

Kila batsya isi liitikiiyi lye liiloba tsana. Baaliloma bari, "Iwe niye uwakhaliilisile imbewo iya Simwaalo iyabirire yaakwiisa kuumuka kukwakhupile umuleekeli weefwe Kusolo? Khali siwashikholile uryo ta." Kila liitikiiyi lye liiloba liilamo liri, "Ise imba ni kamaani kamakali, khali imbeba injabamwo liilowo?"

Bari batsya banyoola imbeba. Baakiloma bari, "Iwe niye uwayabile liilowo mu litikiiyi lye liiloba, lilyakhaliilisile Imbewo iya Simwaalo, iyabirire yaakwiisa kuumuka, kukwakhupile umuleekeli weefwe Kusolo? Khali siwashikholile uryo ta." Imbeba nayo yaaloma iri, "Ise imba uwe kamaani naabi, khali Ipusi indya?"

Kila batsya baanyoola Ipusi. Baakiloma bari, "Iwe niye uulya imbeba, iiyaba liilowo mu litikiiyi lye liiloba, liliikhaliilisa Imbewo iya Simwaalo, iyabirire yaakwiisa kuumuka kukwakhupile umuleekeli weefwe Kusolo? Khali siwashikholile uryo ta." Kila Ipusi yeelamo iri, "Ise imba uwe kamaani naabi khali baambowakho kumukosi?"

Baatsya isi kumukosi. Baakuloma bari, "Iwe niye ubowa Ipusi iilya imbeba, iiyaba liilowo mu litikiiyi lye liiloba, lilikhaliilisa Imbewo iya Simwaalo, iyabirire yakwiisa kuumuka kukwakhupile umuleekeli weefwe Kusolo? Khali siwashikholile uryo ta." Kumukosi nakwo kwaaloma kuri, "Ise imba uwe kamaani naabi, khali ikhalibwa ni kumubano?"

Kila batsya baanyoola Kumubano. Baakuloma bari, "Iwe niye uukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, lilikhaliilisa Imbewo iya Simwaalo, iyabirire yaakwiisa kuumuka kukwakhupile umuleekeli weefwe Kusolo? Khali siwashikholile uryo ta." Kila kumubano nakwo kuloma kuri, "Ise imba uwe kamaani naabi khali kumulilo kuuntsosha?''."

Baatsya baheentsa kumulilo. Baakuloma bari, "Iwe niye uwoosha kumubano, kukukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, lilikhaliilisa imbewo iya Simwaalo,, iyabirire yaakwiisa kuumuka kukwakhupile umuleekeli weefwe Kusolo? Khali siwashikholile uryo ta." Kumulilo nakwo kweelamo kuri, "Ise imba uwe kamaani naabi, khali kameetsi kaasimisa?"

Baatsya isi Kameetsi. Baakaloma bari, "Iwe niye uusimisa kumulilo, kukwoosha kumubano, kukukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, lilikhaliilisa imbewo ya Simwaalo, iyabirire yaakwiisa kuumuka kukwakhupile umuleekeli weefwe Kusolo. Khali siwashikholile uryo ta." Kameetsi nako keelamo kari, "Ise imba uwe kamaani naabi, khali iyeeyi iinywa ise?"

Baatsya banyoola iyeeyi. Baakiloma bari, "Iwe niye uunywa kameetsi, kakasimisa kumulilo, kukwoosha kumubano, kukukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, lilikhaliilisa imbewo ya Simwaalo, iyabirire yaakwiisa kuumuka kukwakhupile umuleekeli weefwe Kusolo. Khali siwashikholile uryo ta." Iyeeyi nayo yeelamo iri, "Ise imba uwe kamaani naabi, khali imbuko inuma?"

Baatsya banyoola imbuko. Baakiloma bari, "Iwe niye uuluma iyeeyi, iinywa kameetsi, kakasimisa kumulilo, kukwoosha kumubano, kukukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, lilikhaliilisa imbewo iya Simwaalo, iyabirire yaakwiisa kuumuka kukwakhupile umuleekeli weefwe Kusolo. Khali siwashikholile uryo ta. Imbuko yeelamo iri, "Ise imba uwe kamaani naabi, khali indiibwa ni khasolo Paa?

Baatsya banyoola khasolo Paa. Baakhaloma bari, "Iwe niye uulya imbuko, iiluma iyeeyi, iinywa kameetsi, kakasimisa kumulilo, kukwoosha kumubano, kukukhala kumukosi, kukubowa Ipusi, iilya imbeba, iiyaba liilowo mu litikiiyi lye liiloba, liliikhaliilisa imbewo ya Simwaalo, iyabirire yakwiisa kuumuka kukwakhupile umuleekeli weefwe Kusolo. Khali siwashikholile uryo ta."

Khaasolo Paa kheyaanga naabi khuumanya khari baakhafumbuule baryo. Khaataamba tse khuuloma. Kila babaana baloma bari, "Iwe niye uwahanusile aasi kuumuka kukwakhupile umuleekeli weefwe Kusolo. Ari iwe niye uuli ni khuufuna shitaambiso!"