Aabawo khaalekho, umukhaana Muloongo, uwamenyatsaka ni basaali beewe aambi ni shishaalo she Bukeewa. Shifukhu shitweela, maayi wa Mulongo waamurumana amutsiile kameetsi khu sebele.

Nga ali khu ntsila atsya waakanana basaale beewe. Nibo abe babaali khuutsya mu shisaali khuureenya tsiikhu. Mulongo naye waakana naabi ari atsye ni nabo. Kila abalomela ari, "Balebe ni muniindilekho ano mu kusaala kumuruumba kuno. Khayo indimakile maayi wase kameetsi." Ne basaale beewe bekaana khuumuliinda.

Mulongo waabaloma ari, "Mbaawo buubi, kane imbanyoole mu shisaali." Wandaba tsindimo khuutaha kameetsi akayilile maayiwe. Lwanyumakho naye waatsya mu shisaali, khuuweentsa basaale beewe.

Aryo waaloonda khayila khakhalola kwe luutsi. Khu luutsi syangelekha yabayo buuyila buukali nga bubiraabiraana busa. Waaba nga alikho ereeba ari, "Khayila shiina kheesi basaale beewe batsiiliilekho?"

Aryo kila aroborakho khaayila khakhafuurakho buubalaayi, wakeenda, wakeenda, ne nga s'anyoola basaale beewe ta. Waaba waaluwile naabi, uri atsya khwiikhalakho busa aasi e kusaala awolekho, liilo lyaamukaama.

Mulongo aatsya khusisimukha mwiilo, nga atsye bweelabuule. Mu shilima isho, waabona tsimoni tsa bintsaali, nga tsimweekhamweekha. Namuunyu nga baamusirakiliile. Isho shaakila waarya naabi, wataamba ni kakaalila. Aaakhakakho khuutima, ne Namuunyu nga baamwibotokheleele.

Namuunyu ubafuurakho buukhulu waamukhookhela ari, "Ukhesyeenda ta. Nga waakhakilekho khuutima, kane khukhulye." Muloongo wekoontselela ari, "Ni mundekhe intsye ingo."

Ne Namuunyu nibo baayila Mulongo ingo waabwe iyaba mu shisaali, nga mwaayitsulamo kamakuumba, ni tsisame nabyuuma. Waakona aasi wafwaana nga isi liilo liwaambile. Mu shiilima isho, Mulongo waawulila Namuunyu bakanikha. Namuunyu mutweela wareeba ari, "Kumulilo kuli kuryee? Kameetsi kalikho kakyemukha?"

Ukuundi weelamwo ari, "Buli shiindu shili shin'goonan'goone. Ari imureere? Ukuundi weelamo ari, "Ee e e e, mureere. Intsala ilikho ikhulya." Baryo baaba nga bali aambi khuukhurura Mulongo khukhwaama mwisari. Namuunyu ufuura buukhulu, waaloma ari, "Inywe Banamuunyu, liindakho. Khebulila likaambila lye shishaalo.

Mbaawo Namuunyu uulya yenyene ta. Khwaakha khwalaangana inda yoosi, khwaliila atweela fweesi." Umukhasi weewe waaloma ari, "Ise kane intsye inaange baakhwe." Namuunyu umufwiiti waaloma ari, "Inatsya khuulaanga bayaaya shaananyina." Ukuundi ari, "Inatsya khuulaanga babaandayeefwe ni bakooko.

"Namuunyu ufuura buukhulu waaloma ari, "Ne ise kane iname ano ni saanyi yeefwe." Aryo wekhala mulyaango waaliinda, nga banamuunyu basalanila tsimbeka tsitsikhali ndweela. Nga ni baatsya baayila imbuka indeeyi. Isho shaakila Namuunyu umukhulu yuno waarakikha khuuwungukhila, iburaangisi we shisheeso. Mu mbuka ifwiiti iri waarakikha khukhwiiyiriira. Iyo niyo iyaba ikhabi ya Mulongo."

Ne isaambo shiina iye khuumubirakho? Namuunyu uyu aaba umuboofu naabi nga wetsuule mu mulyaango mwoosi. Yabawo isaambo ndweela yonyene. Aakhakakho waamusunila khu ngaaki, waamutuuma, lwanyuma waatima, waatima, khukhwoolesa isi tsindimo tseewe tsamunyalisa.

Mbuka nyene iyo, banamuunyu babaandi baakobolaka, baabone shishikholikhile. Kila baloondakho butima, nga basama ni lirima liikali, ni buukhalafu bwe kamaani. Ne nga mbaawo sheesi banyoola ta.

Nga alimbiyisile shishaalo she waabwe, mutweela khu bekhali, waamwofwaasa waayokesela angaaki ari, "Mulongo, Mulongo ali khukhwiitsa! Mulongo ali khukhwiitsa! Paapawe ni maayiwe baatimayo, baamukwa mu shifuba, baasiima Wele, khulwe khuuwonesa umwaana waabwe, nga baloma bari, "Mulongo, Mulongo, ifwe abe khwaayambaasa khuri waafwa!

Khukhwaama ni noolwo, Mulongo ni babaana babaandi sibeelayo luundi khuutsyatsaka mu shisaali bonyene luundi ta.