Omwaka gwali mulala, akasana kaaba kangi, ekyeya kyayoca inho ekyavaaku emiiga okukala okutoolaku omwiga ogw'emikisa.

Wandogoyi n'eyasooka okwogera, "nga bwe mwidhi, tulina enkalamata ate emiiga gyonagyona gikaze okutoolaku ogw'emikisa, ate guli ghala inho. Tukoze tutya?"

Wangamiya yaakoba eti, "Ife abandi tusobola okuja ku mwiga ogw'emikisa. Tuyinza okunwa ate twaleteraku abandi amaadhi."
Wante yairamu, "ghala inho, ghe tunairira okuva ku nhandha betulese einhuma banaaba nga bafiire."

Wantaama yaakoba, "maa! maa! ndha kuja ku mwiga ogw'emikisa nwe amaadhi."
Wambuzi yaabuukira ghaigulu yaakoba, mee! mee! Ndha kuja ku mwiga ogw'emikisa."
Wankoko yaakoba, "keer, ker, ker! ndha kuja ku mwiga ogw'emikisa.

Bawansolo boonaboona baayenda okuja. Wandogoyi yaakulemberamu.
Okujaayo, tikyali kyangu. Wankofu n'eyasembayo einhuma yaakoba ati, "mikwano gyange, tikasobola kweyongerayo ku mwiga ogw'emikisa."
Wankoko yaamira wankofu.

Beeyongerayo. Wankoko yaakoba ati, "bana nkooye, tikasobola kweyongerayo ku mwiga ogw'emikisa."
Wantaama yaamira wankoko.

Olugendo bwe lweyongerayo mu maiso, wantaama yaakoowa.
Wantaama yaakoba, "nkooye. Tikayenda kuja ku mwiga gwa mikisa naire."
Wambuzi yaamira wantaama.

Mubwangu, ni wambuzi yeena yaakoowa nga takaghanga kweyongerayo ku mwiga gwa mikisa.
Wangamiya yaacuusa yaamira wambuzi.
Nga wangamiya amaze okukoowa, wante yaamumira.

Nga wante mu butuufu yeena nga takasoboka kweyongerayo, Wandogoyi yaamumira.

Okuba nti yali nga asigairegho yenka, Wandogoyi yaakola ekisoboka yaatuuka ku mwiga ogw'emikisa.
Wandogoyi yaatuuka mu bukooghu obw'ekitalo.

Mu kutuuka kwe, Wandogoyi yaakotamya omutwe gwe yaafulumya wante. Wante yaafulumya wangamiya, wangamiya yaafulumya wambuzi, wambuzi yaafulumya wantaama, wantaama yaafulumya wankoko, wankoko yaafulumya wankofu.

Eyo n'engeri ba wansolo gye baasobolamu kunwa amaadhi ku mwiga ogw'emikisa.