Olufumo luno lwogera ku musaadha ni mutabane abaali nga baviiraku mu kyalo eky'eghalaku. Eriina lye nga ni Yowaana eyali nga musaadha gha mutewaana. Abantu ab'okukyalo ekyo baali nga tibamwenderaku irala kubanga yali mulimba inho.

Mu bwire, Yowaana nga ayinza okulinda buli muntu yeenayeena yaatenduku memale yaayemerera mu luya lwe memale yaatandiika okukuba enduulu, "munhambe! munhambe! nnhumbiibwa. Bana nsaba buyambi!"

Nga abantu bayinza okwidha n'amafumo gaibwe mu ngalo. "Hahahahahaaa! Yowaana nga ayinza okubaseka okutuusa enda ye bwezimba n'okuzimba.

"Oli bulungi? Ensolo dhirigha edhikulumbye? Nga abantu bayinza okweyasa. "Dhigemye eyo, bana munhambe'! Yowaanang nga ayinza okubakoba era yaabasonkera mu nzikiiza einhuma w'emiti. Nga bamaze okunoonenkereza, baamukoba okulekera okulimbanga atyo era aje alambaale.

Lwali lulala mu bwire, mutabane yaamuwulira nga era ayasiikana nga asaba buyambi. Mutabane kuluno tiyasituka kuba lata we yali nga alimba inho abantu. Aye obwire buno mutabane tiyawulira nga abantu baigulawo olwigi okwidha okubayamba. Yawulira buwulire nga bbaabba we ali bwa kukekema.

Abantu ab'okukyalo kuluno tibaali betegefu kuja kumuyamba kubanga baali baidhi bati Yowaana akaali mu bulimba bwe. Baasalawo okutenduka butenduke nga bamulinda bwa naalekerera okukekema.

"Munhambe! munhambe," mutabane yalinda yaalinda. Aye ku luno yakizuula nga ebitali kuja bulungi kubanga yamuwulinga nga amaloboozige gacuuse atenga alikulira nga bwe kitabanga buliidho.

Agho yaafuluma yaabona nga ensolo dhiri kubinga
bbaabba we. Agho omulenzi yaakunaania omuliro ensolo dhalumuka.

Ensolo dha bulira mu nzikiiza. Yowaana agho yeenhumiriza mu mutabane we omugezi inho. Yali musanhufu olw'okumutaasa okuliibwa ensolo.

Okuva ni kwolo, Yowaana tiyairamu kulimba abantu kuba yataasibwa bwa mutabane yenka nga ezira wundi amutaasiisa.