Manaasi, Nabubi ni Wanduuyu baaba basaale. Baamenyatsaka mu syaalo shiilayi sye mu njiinji. Wanduuyu aalima kumukuunda kumukali kwe tsinyanyi ni bibyaano. Abe yakhaba nga Wanduuyu aakabatsakilakho musaale weewe bibiindu bino. Ne Manasi s'aaba musangaafu ta. Aabamo likoko.

Manaasi waakhala kamakyesi ke khukhwiiyisakho kumukuunda kwa Wanduuyu. Lubaluba Wanduuyu waarama umutaambi nga mbaawo isi akona ta. Ne Manaasi niye wibona nga niye umweene mukuunda ni bibyaano abe bibyaba bya Wanduuyu.

Manaasi waatsya mwikulanilo khuukulisa bibyaano ni tsinyanyi. Aryo waamisamo kamapeesa makali naabi ketsusa indubi. Waabukulakho kamalala waakulilakho be muungo mweewe nabukubo, waamala waamura mu ndubi khu ngaaki khwe kamapeesa.

Manaasi ni kumwikhoyo kumukali wakeenda nga wetwiikhile indubi khu murwe naluundi nga eemba. Inyaanga yoosi aaba ali khukhwambaasa khu biindu byeesi anyala khuukula mu mapeesa keewe ako.

Nga ashikeenda aryo, ifula yaarakikha khumoonyakala. Lubaluba yaarakikha khutsutsukha ingali. Manaasi waalekha indubi andulo khu mukhoosi, niye waatsya wekama ifula mu kusaala. Ne s'aarusa tsimoni khu ndubi iyitsuulemo buyiindifu bweewe ta.

Ifula yeloosela khuutsutsukha ni kamaani nga itosa Manaasi, ni khuumureerera imbewo. Aryo waatima waatsya weebisa mwilowo. Welomela ari, "Inarama mwiilowo muno, khukhwoolesa ifula niinaheesa. Shiilayi ndi naabiimbile nabukubo khu mapeesa kaase."

Mu mbuka ifwiiti iri, ingosya iyaba ipamburukhila mu ngaaki yaabona indubi aambi ni kumukhoosi. Kila yiikha yaalola mu ndubi, yaabonamo kamapeesa mu nabukubo. Yaakhalawo khuubimbilila indubi ni tsindaaha khukhwoolesa ifula ni yaheesa.

Manaasi waabona ingosya nga yekhaale khu ndubi yeewe. Kila Manasi eetsa aloma ari, "Musaale, waanyala naabi khukhuniindilakho indubi yase." Ingosya yeelamo iri, "Manaasi, waama khuloma uri shiina Naakhuwuliile buulayi namwee? Indubi iyoowo? Indubi yino iyase. Injinyoolele ano khu ndulo khwe kumukhoosi!" Manaasi s'aafukiilisa byeesi ali khuuwulila ta. Kila aloma ingosya ari, "Mu n'gali indubi iyase!"

Mwirima liikali, Manaasi waatsya khukhwiilootsa w'omuwuli we shisiintsa. Ne ingosya yaareeba umuwuli ni bayeeti beewe iri, "Shinyalikha shiryeena umuundu khuulekha indubi ilimo kamapeesa ni nabukubo khu mukhoosi nga mbaawo umuliindi ta?" Manaasi naye weelamo ari, "Ise samweene abeele naloleleele indubi yase. Yino ili indubi yase, kamapeesa ni nabukubo mweene." Ingosya yaamwiilamo iri, "Ise imbeele naabiimbiliile indubi ni tsindaaha tsase, nio iwe waapuunukha khukhwaama isi ikhamanyile ta, weetsa waaloma uri indubi ni bibiilimo bili bibyoowo!"

Nga umuwuli ni bayeeti beewe baamalile khuurekeeresa buulayi, baaloma Manaasi ni Ingosya baarura ibulafu. Kila baakhulu bano baarakikha khuukhupanisa bibyambaaso khuumala imbuka indeeyi. Lwanyuma baafukiilisana she khuukhola.

Balaanga Manaasi Nabubi ni Ingosya khuukobola. Kila balaangilila bari, "Ifwe khufukiilisana ni tsilomo tseesi Ingosya ilomile." Balooselakho bari, "Ingosya siili intsifwi ta. Iwe niye ukanile khukhwiiyisakho bibiindu byeewe." Manaasi waalekha khufukiilisana ni byeesi awuliile ta. Waruundukha kamasika waalila.

Khaangukho tsilomo tsaasalanila buli aandu oosi bari kumusaango kwafuurire Manaasi. Nga akyeenda arura, waawulila Wanduuyu nga atsekha ikiniaali. Wanduuyu waakobola mu mukuunda kweewe, waalima biilyo ni tsinyanyi luundi. Lubaluba Manaasi waakobolayo mu butaambi luundi, nga s'aali ni basaale ta.