Awo olwatuuka nga wabaawo omughala omuto nga bamweta Tuseerana. Bbaabba we nga amaze okufa yabanga yenka ni maama we. Lulala, maama we yasalagho at baali baidha kuja mu kyalo ekindhi batoolere obulamu obuyaaka. Tuseerana tiyayenda kuva mu kyalo kye era yatoolera okulira.

Maama we yatya okuleka mughalawe yenka kuba mu mpuku edhaali okumpi n'ekyalo ekyo mwali mubaamu ba Naiwano. Aye Tuseerana yalira inho inho, maama we olumalirira yaamala gamuganha asigale.

Maama wa Tuseerana yakoba ati yali aidha kumuleeteranga emere buli lunaku. Yakoba ati, "Ndidha kwemba olwemba omanhe nga ninze. Mwana wange, otaigulirawo muntu wundi." Yayemba olwemba: "Tuseerana mwana wange! Tuseerana mwana wange! Fuluma onhwe obuugi bwo! Fuluma onhwe obuugi bwo!"

Enkeera, maama wa Tuseerana yaidha nga aleese emere. Yayemba olwemba lwaibwe olw'endhawulo. Tuseerana yaigulawo olwigi era yaatoola emere ya maama we eyali ewooma einho. Agho maama we yaamunhwegera yairayo mu maka ge amayaaka.

Waaliwo Naiwano nga yeekwese mu nsiko nga alikubona era nga alikuwulirisa Tuseerana ni maamawe. Tuseerana bweyazikiza eitaala obwire, yaawulira eiroboozi einene ku mulyango nga lyemba olwemba lwa maamawe. Tuseerana mwana wange! Tuseerana mwana wange! Fuluma onhwe buugi wo! Naiwano atyo bweyayemba. Tuseerana yayasiikana ati, "Ja ere! Ti niiwe maama wange! Oli Naiwano!

Naiwano yavaawo nga awulira bubi yaaja yaabulira mu mpuka. Buli nkyo era buli igulo maama wa Tuseerana yamuleeteranga emmere. Era buli nkyo ni buli igulo Naiwano yena yaidhanga. Aye buli kiseera Tuseerana yamubinganga. Yamanhanga eiroboozi lye einhenhe nga ayemba olwemba lwa maama we.

Lulala, Naiwano yaafuna ekidhuubo. "Mpanga okucuusa amamiro gange gaaba nga aga maama wa Tuseerana." Yakuma omuliro yaasuulamu eibaalae eryetooloovuu obulungi. Eibaale bweryasuuwa einho nerimyuka, yaaligema yaalimira. "Gudu" Naiwano yaamira eibaale.

Naiwano yatandiika okwemba. Yatuuma olweisanhu, bweyawulira nga amamiroge mawoomu oti ga maama wa Tuseerana! Mu nkyo ku lunaku olwairirira, Naiwano yaaja ewa Tuseerana. Bweyatuuka ku mulyango yaayemba ati: "Tuseerana mwana wange! Tuseerana mwana wange! Fuluma onhwe buugi wo! Fuluma onhwe buugi wo!"

Tuseerana yakyamuukirira bweyawulira amamiro ga maamawe. Yaigulawo olwigi okuja okubona nga Naiwano ayemereire awo. Yagezaaku okwigala olwigi aye Naiwano yali mwangu inho! Yagema Tuseerana yaamusuula mu kisawo.

Naiwano omusangaavu yatambula yairayo mu mpuku ye. "Yakoba mule ati, "Eh nga olunaku luno lulungi! Nguli mbaire ni kumwenge, gwandijiiriire bulunji n'ekyeigulo kyange leero."

Nga wabiseewo akaseera katono, maama wa Tuseerane yaidha nga buliidho okuleetera mughalawe emere. Yayemba olwemba lwe aye Tuseerana tiyafuluma. Yairamu yaayemba aye era Tuseerana tiyafuluma. Bweyamala okwemba ogw'okusatu, yaasamba olwigi. Tuseerana nga tabonekaku. Ininha yaategeera ekyali kibairewo era amangu ago yaakola enteekateeka.

Yatoola omwenge yaayuwaku mu ibuga einene yeetwika yaaja mu mpuku. Yaalamusa Naiwano ati, "Osibye otya eyo, Naiwano!" Naiwano yawunhiriza akawoowo k'omwenge yaigulawo olwigi. Maama wa Tuseerana yaakoba ati, "Mbaire ndikubitawo naawulira nga oli kwemba bulungi inho. Ndikuja mu kyalo ekindhi eriyo ekibigiya.

"Kankuyuyireku omwenge memale neeyongereyo. Naiwano yali taghanga kusubwa mukisa gwa kunhwa ku mwenge! Yayeta maama wa Tuseerana yaingira mu mpuku ye. Naiwano yanhwa omwenge mu mugudho mulala. Maama wa Tuseerana yaamwongera emirundi n'emirundi okutuusa bwegwawaamu. Naiwano yaatamiira inho yaagwa wansi endoolo dhaamutwala.

Maama wa Tuseerana olwawulira ati nga Naiwano alikufuluuta, yaasimulula ekisawo ekyali awo mu mpuku. Tuseerana yatuuma mu kisawo, me baalumuka mbiro. Okuva n'olwo, Tuseerane yatoolera okuba ni maamawe mu kyalo kire ekindhi. Babangawo nga basangaavu era ba Naiwano tibairamu kubadaazadaaza.