Aabawo khaalekho, yabawo umusaani mutweela uwambaasatsaka ari basooleli bali ni kamakyesi khufuurisa basakhulu. Ni khu shifukhu shitweela webuyilila umukhasi weewe ari niye ali uwe kamakyesi khuuminya paapawe umurye. Abe angaba nga umukhasi we aakhakakho naabi khuumukhaandisa, umuseetsa waalekha khushifukiilisa ta.

Kila khu shifukhu shitweela, nga umukhasiwe waakyeniyiilekho basaali beewe, waboolelakho paapawe nga umusaani we ni elaanga khuuba uwe kamakyesi khuuminya niye umusakhulu. Umusakhulu waaloma umukhaana we akoboleyo areebe umuseetsawe oba nga ashiin'gan'gasa ilomo iyo.

Umusaaniwe ndi waasiindikha umukhasiwe khuukhaka paapawe amukoyele kamalwa khukhwaama mu namufeeli amuyilile.

Paapa w'omukhaana waatsekha butsekhi, lwekhuuba mbaawo shishimeesa shishinyala shaama mu namufeeli ta. Ne lwanyuma waasiindikha umukhaana weewe khuukobolayo ni buurume isi umusaaniwe ari waafukiilisile khuukoya kamalwa khukhwaama mu namufeeli, ne nga kaalulile, uwiitsa khuusuta akhaba umuseetsa namwe umukhasi ta.

Umusaaniwe wenyoola nga lukyesikyesi lweewe lweboyile, lwekhuuba shibala shilimo baseetsa ni bakhasi bonyene. Khukhwaama lulweenelwo, waafukiilisa lusimo lwe bakhale lululoma luri, "Kamayi sikatsowa kaleeha kafuura kumurwe ta."